Reforma territoriale, PD: Mos votoni, drafti ynë është dërguar për konsultim

Partia Demokratike ka kërkuar ndërprerjen e diskutimeve në Komisionin e Ligjeve për reformën territoriale, deri në marrjen e përgjigjeve nga bashkitë për draftin e opozitës, i cili parashikon rritjen e numrit të bashkive në 100.

Gjatë mbledhjes së Komisionit, deputeti i PD-së, Oerd Bylykbashi, kërkoi që procesi të mos vijojë me votimin, duke argumentuar se propozimi i opozitës është dërguar për konsultim te njësitë e vetëqeverisjes vendore.

“Mos votoni, është dërguar për konsultim projekti ynë”, u shpreh Bylykbashi.

Edhe deputetja e PD-së, Jorida Tabaku, ngriti shqetësimin për mungesën e konsultimit me Bashkinë e Tiranës. Ajo iu referua deklarimeve të kryebashkiakut Erion Veliaj, duke i cilësuar shqetësimet e tij si serioze.

Opozita kërkon që përgjigjet nga njësitë vendore të merren në konsideratë përpara vijimit të procesit të diskutimit dhe vendimmarrjes për reformën territoriale.