Rekord aplikimesh për Akademinë e Forcave të Armatosura, 1114 maturantë në garë për 70 kuota studimi

TIRANË, 7 gusht/ATSH/  Ministria e Mbrojtjes informoi sot se ka interes të lartë të të rinjve për të studiuar në Akademinë e Forcave të Armatosura, duke shënuar numër rekord aplikimesh për programet që ofron kjo akademi.

“1114 të rinj e të reja kanë aplikuar për të fituar një të drejtë studimi nga 70 kuota të planifikuara për ciklin e parë bachelor, për këtë vit akademik”, thuhet në njoftimin për shtyp të ministrisë.

Sipas ministrisë, ky është numri më i lartë i aplikimeve krahasuar me tre vitet e mëparshme.

Akademia e Forcave të Armatosura ofron 3 programe në ciklin bachelor: Teknologji Informacioni, Marrëdhënie ndërkombëtare dhe Shkenca Komunikimi në fushën e mbrojtjes.

Për të gjithë fituesit, përveç një karriere të sigurt, përsosjes së aftësive në një gamë të gjerë profesionesh ofrohen programe akademike prestigjioze dhe unike në Shqipëri, pagë mujore dinjitoze, akomodim dhe trajtim ushqimor gjatë gjithë periudhës së studimit.

/k.s/