Rezoluta që dënon sulmin serb në Kosovë, Kuvendi e diskuton më 12 tetor

Seanca e Posaçme e Kuvendit të Shqipërisë që do të diskutojë për rezolutën për të dënuar sulmin në Banjskë të Kosovës do të mbahet më 12 tetor.

Kjo datë është vendosur në konferencën e kryetarëve e cila është shoqëruar me debate ku kreu i grupit parlamentar të Partisë Demokratikë, Gazment Bardhi kërkoi seancë urgjente për mocion me debat dhe miratimin e rezolutës për situatën në Kosovë.

“Është urgjente që të zhvillojmë mocionin me debat. Nuk mundet ne të jemi të fundit. Parlamenti Evropian e ka zhvilluar”, tha Bardhi.

Duke folur edhe për mediat jashtë kryesisë së Kuvendit, Gazment Bardhi ka theksuar se rezoluta për Kosovën ku do të dënohen sulmet serbe, nuk mund të pasqyrojë atë të qëndrimit të Serbisë siç është propozuar nga Partia Socialiste për të cilën Bardhi theksoi se duhet të jetë gabim.

“Pa diskutim që mes qëndrimit të Kosovës që është hetimi ndërkombëtar dhe qëndrimit të Serbisë që hetimi të kryhet nga autoritetet serbe, besoj edhe ne por edhe grupi i saj parlamentar do të duhet të mbështesë qëndrimin e Kosovës.

Pra, do të duhet të ketë një hetim ndërkombëtar. Nuk mundet rezoluta e Kuvendit të Shqipërisë të pasqyrojë nën të qëndrimin e Serbisë në rezolutën tonë”, u shpreh Bardhi.

Ai theksoi më tej se “ngjarja ka ndodhur në territorin e Kosovës. Ajo është një çështje që hetohet nga institucionet e drejtësisë në Kosovë. Qëndrimi i Kosovës ka qenë që të ketë një hetim ndërkombëtar mbi rolin dhe përgjegjësinë e republikës së Serbisë të cilën ne e mbështesim 100 për qind”.

Çuçi: Do të punohet me opozitën për unifikimin e draftrezolutës për Kosovën

Kreu i grupit parlamentar të PS-së, Bledi Çuçi,  pas përfundimit të mbledhjes së Konferencës së Kryetarëve, deklaroi se do të punohet për unifikimin e një drafti të përbashkët me opozitën, për rezolutën për Kosovën.

“Të unifikojmë draftet për rezolutën e Kosovës. Kjo është çështje protokollare e parlamentit. Ne nuk kemi rrëzuar interpelancë, kemi bashkuar dy kërkesat për rezolutë me interpelancën, por bashkuam kërkesat”, tha Çuçi.

Më pas ai është ndalur te propozimet e opozitës për Avokatin e Popullit,duke thënë se, “kjo çështje nuk është domain i Bashës apo i Bardhit por i takon opozitës në tërësi”.

“Avokati i Popullit është një çështje për të cilën e kemi bërë të qartë qëndrimin. Duhet zgjedhur nga propozimet që duhet të vijnë nga opozita. Por duhet personi që do të propozojë opozita në krye të Avokatit të Popullit duhet të jetë me integritet të lartë profesional dhe njerëzor”, tha ai.

Në konferencën e kryetarëve palët kanë rënë dakord të dalin me një rezolutë të përbashkët për dënimit e sulmit të 24 shtatorit në Kosovë e cila do të paraqitet në Kuvendin më 12 tetor.

/rtsh.al/