Rezultatet paraprake në Serbi, humbje e thellë e Vuçiç, Lista Studentore fiton me 52.1%, partia e ish-presidentit mbetet pas me 39.3%

Lista Studentore “Studentët fitojnë” ka marrë 52.1% të votave në zgjedhjet parlamentare në Serbi, sipas rezultateve paraprake të publikuara nga Qendra për Zgjedhje të Lira dhe Demokraci (CESID).

Në vendin e dytë renditet lista “Aleksandar Vuçiç – Serbia e Bashkuar”, me 39.3% të votave.

Sipas përllogaritjeve të CESID-it, këto rezultate përkthehen në 138 mandate për Listën Studentore dhe 104 për koalicionin e mbështetur nga Vuçiçi, në Kuvendin e Serbisë, i cili ka gjithsej 250 vende.

Rezultatet paraprake përputhen me deklaratën e presidentit serb, Aleksandar Vuçiç, i cili më herët gjatë mbrëmjes pranoi humbjen, duke thënë se lista e studentëve kishte fituar zgjedhjet. Ai vlerësoi se kjo listë do të siguronte nga 135 deri në 140 mandate, ndërsa koalicioni i tij rreth 105.

Fitorja e Listës Studentore është shoqëruar me festime në qendër të Beogradit dhe në shtabin e saj, ku qindra qytetarë, studentë dhe kandidatë kanë brohoritur për rezultatin. “Kurrë më tiranë në vendin tonë”, deklaroi Illija Srdanoviq, i pari në listën studentore.

Zgjedhjet e parakohshme parlamentare u zhvilluan mes 18 listave zgjedhore, me 2,418 kandidatë për 250 vende në Kuvend. Të drejtë vote kishin mbi 6.45 milionë qytetarë, ndërsa votimi u zhvillua në 8,392 qendra votimi.

Rezultatet e publikuara nga CESID janë paraprake; ndarja përfundimtare e mandateve do të përcaktohet pas përfundimit të procedurave zyrtare zgjedhore.