Rezultati për Tiranën, numërohen fletët e kontestuara

Mesa duket, procedura e numërimit të votave nuk ka një afat të caktuar. Për këtë, në Komisionin Qëndror të Zgjedhjeve ka nisur numërimi i fletëve të panumëruara, duke ndryshuar kësisoj dhe tabelën përmbledhëse përfundimtare. Në ambjentet e KQZ-së ka marrë start numërimi, kjo pas pushimit deri në orën 17.00, nga të gjithë anëtarët në konsensus të plotë.
 

Në kutinë 20 21/1 e cila është hapur në orën 17.23 mësohet se nga dy fletë të kontestuara, kryetari i KQZ-së Arben Ristani miratoi një fletë për kandidatin për kryetar Bashkie Edi Rama dhe një tjetër për këshill bashkiak në favor të Partisë Demokratike.
 

Në vijim , kutia 20 29/1, u kontestuan pesë fletë votimi, konkretisht për kryetarin e njësisë bashkiake. “Nga numërimi i kutisë 20 29/1 u konstatuan fletë votimi të gjetuara, për njësinë bashkiake, 2 vota për PD, për kryetar Bashkie 1 votë për kandidatin e PS Rama, 2 fletë për kandidatin demokrat Lulzim Basha. Këto të pasqyrohen në tabelën përkatëse” tha më tej Ristani.

Ora 17.50, shënon hapjen e kutisë së 36, ndërsa jo pak debate është krijuar në ambientet e KQZ-së nga të dyja palët, duke mos gjetur gjuhen e përbashkët. Kryetari Ristani shpalli të vlefshme një fletë për kandidatin për kryetar Bashkie Lulzim Basha dhe një tjetër për këshill bashkiak në favor të Partisë Demokratike.