Rikthehet Festivali Folklorik në Gjirokastër, “sofra e trashëgimisë” sjell paradën e motiveve, këngëve dhe valleve tradicionale
Pas 8 vitesh mungesë, kalaja e Gjirokastrës do të vishet sërish nga motive tradicionale, ngjyra dhe këngët e vallet shqiptare nga të gjitha krahinat.
Nga 24 qershori deri më 1 korrik 2023 do të zhvillohet Festivali Folklorik Kombëtar në Gjirokastër, i cili për herë të fundit u zhvillua në vitin 2015.
Festivali Kombëtar Folklorik i Gjirokastrës është ngjarja më e rëndësishme dhe sofra më e madhe e trashëgimisë kulturën shqiptare.
Parada e motiveve, ritmeve, ngjyrave, këngëve, valleve, riteve do të shpalosen në paradën që do të zhvillohet në qytetin e gurtë.
Lajmin e rikthimit të Festivalit Folklorik Kombëtar në Gjirokastër e ka ndarë dhe kryeministri Edi Rama.
“Mirëmëngjes dhe me lajmin e bukur të rikthimit të Festivalit Folklorik Kombëtar në Kalanë e Gjirokastrës së zbukuruar e gjallëruar si me magji nga ngjyrat, motivet, ritmet, këngët e vallet e të gjithë krahinave shqiptare, ju uroj një të diel të paqtë”, shkruan Rama në facebook.
Festivali u mbajt për herë të parë në vitin 1968 dhe qëllimi kryesor i tij është pasqyrimi i gjerë i gjinive të folklorit dhe vlerave të tij. Ky festival ka gjithashtu si qëllim të mbrojë dhe promovojë vlerat më të mira muzikore, koreografike, etnografike të krijuara prej shekujsh.
/rtsh.al/