Rregullorja e re, avokatët përshkallëzojnë bojkotin ndaj GJKKO, protesta zgjerohet edhe në seancat për masat e sigurisë

Avokatët përshkallëzojnë bojkotin ndaj GJKKO në kundërshtim me rregulloren e re që kufizon përdorimin e celularëve në sallat e gjyqit. Pas rreth tre javësh bojkot të proceseve, Dhoma Kombëtare e Avokatisë ka vendosur që protesta të shtrihet edhe në seancat për caktimin dhe shqyrtimin e masave të sigurisë.

Vendimi u mor këtë të mërkurë gjatë mbledhjes së Dhomës Kombëtare të Avokatisë. Deri tani, bojkoti nuk përfshinte seancat për masat e sigurisë, ndërsa tashmë ai prek edhe këto procedura.

Pavarësisht qëndrimit të avokatëve, GJKKO nuk ka ndryshuar rregulloren e re. Ndërkohë, Dhoma e Avokatisë ka deklaruar se do të mbulojë gjobat që mund t’u vendosen avokatëve për mungesën në seanca.

Zgjerimi i bojkotit pritet të ndikojë edhe në seancat që lidhen me personat nën hetim, veçanërisht ato për vendosjen apo shqyrtimin e masave të sigurisë.

/rtsh.al/