Rritet numri i tatimpaguesve: ndikuan lufta ndaj evazionit fiskal, digjitalizimi dhe lehtësimi i procedurave tatimore

Sipas të dhënave të publikuara nga Drejtoria e Përgjithshme e Tatimeve, krahasuar me të njëjtën periudhë të vitit 2024 janë regjistruar 2.138 tatimpagues më shumë.

Paralelisht, vetëm në muajin qershor 2025 janë deklaruar 14.770 punonjës shtesë krahasuar me qershorin e vitit të kaluar.

Këto shifra konsiderohen një tregues i qartë i rritjes së formalizimit të tregut të punës dhe përmirësimit të disiplinës fiskale.

Ndër faktorët kryesorë që kanë ndikuar në këtë zhvillim janë rritja e kontrolleve dhe zbatimi më i rreptë i ligjit ndaj subjekteve që ushtrojnë evazion fiskal, çka ka bërë që sipërmarrjet të orientohen drejt respektimit të detyrimeve ligjore.

Po ashtu, digjitalizimi i procedurave tatimore ka lehtësuar regjistrimin dhe raportimin, duke reduktuar burokracinë dhe kostot administrative.

Një tjetër element që ka ndikuar është rritja e ndërgjegjësimit të bizneseve mbi përfitimet afatgjata të formalizimit, si qasja më e lehtë në kredi apo përfshirja në kontrata publike.

Zgjerimi i numrit të tatimpaguesve dhe punonjësve të deklaruar shihet jo vetëm si rezultat i politikave fiskale, por edhe si një sinjal pozitiv për ecurinë e ekonomisë shqiptare.

Gazetar: Omer Saraçi

/rtsh.al/