Ruci: Berisha duhej përjashtuar nga gjithë legjislatura

Duke iu referuar vendimit të djeshëm të kryetares së kuvendit për përjashtimin e deputetit Taulant Balla për dy javë nga seancat plenare, kreu i grupit parlamentar socialist Gramoz Ruci, tha se Sali Berisha duhej përjashtuar jo dy seanca, por gjithë legjislaturën pas fjalimit të 26 nëntorit.

"Nëse ka një politikan në Shqipëri, që duhej përjashtuar jo për dy javë, por për një legjislaturë të tërë, ky është vetëm një deputet që e ka emrin Sali Berisha. Këtu kam fjalimin e famshëm të Sali Berishës të mbajtur në foltoren e parlamentit në 26 nëntor ku kavalieri shqiptar kërcënonte për shkulje dhëmbësh e nofullash, etiketonte përfaqësuesit e opozitës me fjalë që nuk mund të thuhen në publik, por Kryetarja e parlamentit dhe jo vetem ajo, por të gjithë deputetët e kësaj maxhorance zgërdhiheshin dhe duartrokisnin kavalierin e tyre. Vendimi i djeshëm ishte një vendim i turpshëm i kësaj mazhorance që përdor pushtetin e vjedhur për të fshehur vjedhjet e pushtetit. Një mazhorancë që nuk di të përgjigjet me argumente, por zgjedh përjashtimin e dëbimin. Vendimi i djeshëm ishte veçse njolla më e fundit e turpit që u vendos në këtë parlament nga Kryetarja e tij që do të mbahet mend si kryetarja e zheleve dhe rreckave, e komanduar me sms nga një kryeministër i papërgjegjshëm", u shpreh Ruci.