Rusi, Lidhja e Votuesve kritikon zgjedhjet presidenciale

Lidhja Ruse e Votuesve, e përbërë nga personat e njohur dhe aktivistët kundër udhëheqjes së Vlladimir Putinit, ka dënuar zgjedhjet presidenciale të së dielës, duke i cilësuar si “fyerje për shoqërinë civile”.

Në një deklateë, kjo lidhje tha se “është e pamundshme të njihen rezultatet e zgjedhjeve presidenciale, për shkak të shkeljeve të mëdha”.

Të dielën e kaluar, më 4 mars, Vlladimir Putin, aktualisht kryeministër, ka siguruar edhe mandatin e tretë presidencial, duke fituar afro 64% të votave, sipas rezultateve zyrtare.

Këto votime ishin kritikuar edhe nga vëzhguesit ndërkombëtarë, që thanë se procesi ishte jokorrekt pasi autoritetet anonin për Putinin dhe se nuk kishte garë të mirëfilltë.