SHBA – Trump i heq të drejtën ish-presidentit Biden për informacionet sekrete

UASHINGTON, 8 shkurt /ATSH/ – Presidenti i SHBA-së, Donald Trump deklaroi se po i revokon lejen e sigurisë ish-presidentit, Joe Biden dhe të drejtën në informacionet sekrete, pasi paraardhësi i tij bëri të njëjtën gjë me të katër vjet më parë, sipas BBC.

“Nuk ka nevojë që Joe Biden të vazhdojë të marrë akses në informacionin sekret”, shkroi Trump në një postim në platformën e tij ”Truth Social”.

“JOE, JE I SHKARKUAR”, shtoi republikani me germa kapitale.

Trump tashmë ka revokuar lejen e sigurisë për më shumë se katër duzina ish-zyrtarësh të shërbimeve sekrete, të cilët ai i akuzoi për ndërhyrje në zgjedhjet e vitit 2020 në favor të Biden.

Trump postoi të premten në mbrëmje se Biden “krijoi këtë precedent në vitin 2021, kur ai udhëzoi Komunitetin e Inteligjencës (IC) të ndalonte presidentin e 45-të të Shteteve të Bashkuara (ME!) të aksesonte detajet mbi Sigurinë Kombëtare, një mirësjellje e dhënë për ish-presidentët”.

Ai tha se Bidenit “nuk mund t’i besohej informacioni i ndjeshëm”, duke përmendur një hetim të Departamentit të Drejtësisë për ruajtjen e dosjevesekrete nga demokrati, i cili arriti në përfundimin se megjithëse nuk kishte nevojë të ngrihej akuza penale, Biden kishte një kujtesë të dobët.

Hetimi tha se Biden nuk ishte në gjendje të kujtonte ngjarje të rëndësishme të jetës si viti i vdekjes së djalit të tij, Beau, dhe kur ai shërbeu si zëvendëspresident i Barack Obamës.

Biden e hodhi poshtë këtë.

Ish-presidenti, i cili është larguar pak nga qendra e vëmendjes që nga largimi i postit të tij muajin e kaluar, nuk iu përgjigj menjëherë lëvizjes së Trumpit./ a.jor.