SHBA nis kthimin e tarifave/Rimbursohen 100 miliardë dollarë, ndërsa tensionet me Kinën vijojnë
Administrata e presidentit amerikan Donald Trump ka nisur kthimin e rreth 100 miliardë dollarëve të mbledhur nga tarifat doganore të shpallura të paligjshme nga Gjykata Supreme. Gjykata vendosi se presidenti nuk kishte autoritet t’i vendoste këto tarifa pa miratimin e Kongresit.
Shuma që po rimbursohet përbën rreth 60 për qind të të ardhurave të mbledhura nga këto tarifa. Pas vendimit, autoritetet amerikane të doganave nisën procedurat për kthimin e parave tek importuesit që kanë të drejtë të përfitojnë.
Edhe pse Donald Trump kundërshtoi vendimin dhe mbrojti politikën e tij tregtare, procesi i rimbursimeve ka ecur më shpejt nga sa ishte parashikuar. Të dhënat zyrtare tregojnë se kërkesa me vlerë mbi 128 miliardë dollarë janë tashmë në shqyrtim.
Sipas rregullave në fuqi, vetëm importuesit e regjistruar mund të kërkojnë kthimin e shumave të paguara, çka mund të lërë jashtë skemës shumë biznese të vogla. Kompania Amazon njoftoi se ka marrë rreth 600 milionë dollarë rimbursime dhe se një pjesë e tyre do t’u kthehet klientëve.
Ndërkohë, administrata Trump ka vendosur tarifa të reja për importe të ndryshme duke u mbështetur në baza të tjera ligjore, ndërsa edhe këto masa po kundërshtohen në gjykatë. Në të njëjtën kohë, Kina ka vendosur kufizime të reja për eksportin e komponentëve të dronëve drejt Shteteve të Bashkuara, por thekson se mbetet e interesuar për ruajtjen e marrëdhënieve të qëndrueshme tregtare mes dy vendeve.
/rtsh.al/