Sala: Investimet në shëndetësi 4,2 miliardë lekë
TIRANË, 12 nëntor /ATSH/ Ministrja e Shëndetësisë dhe Mirëqenies Sociale, Evis Sala u shpreh sot se totali i investimeve për vitin 2026 është 4,2 miliardë lekë, i ndarë në financim i brendshëm 3,5 miliardë lekë dhe financim i huaj 0,7 miliard lekë.
Sa i takon programit të kujdesit spitalor, Sala tha se gjatë prezantimit të projektbuxhetit 2026 në Komisionin për Shëndetësinë dhe Mirëqenien Sociale, se tavani i miratuar është në vlerën 2,8 miliardë lekë.
Ministrja deklaroi se “investimet e reja që parashikohen për vitin 2026 janë në infrastrukturë, si ndërtime të reja në vlerë 1,3 miliardë lekë ku përfshihet ndërtimi i godinës së re të Spitalit Rajonal Korçë. Rikonstruksione në vlerë 1,1 miliardë lekë ku përfshihen urgjenca e Spitalit Durrës, godina e Spitalit Psikiatrik të QSUT, Spitali i Tropojës si dhe rikonstruksion i godinës qendrore të Spitalit Mat”.
Gjithashtu me buxhetin 2026 parashikohet blerje pajisje në vlerën 1,1 miliardë lekë si pajisje për qendrën e re të back-up për QKUM (Urgjenca); pajisje dhe hoteleri mjekësore për spitalet (echo, grafi stacionare dhe të lëvizshme, etj.) pajisje mjekësore për QSUNT dhe kosto lokale për blerjen e Pet CT nga Agjencia Atomike (për QSUNT).
Ajo shtoi se investimi në godina të reja është në vlerën 553 milionë lekë ku përfshihet ndërtimi i disa godinave të reja për Spitalin Psikiatrik Elbasan, si edhe ndërtimi i godinës së re të back-up për QKUM.
Ministrja Sala u ndal edhe te rikonstruksionet, që janë në vlerë 2,7 miliardë lekë për vitet 2026-2028 ku përfshihen Materniteti nr. 1 Tiranë, godina qendrore e Spitalit Gjirokastër, godina qendrore e Spitalit Pogradec, disa pavioneve të Spitalit Berat, godina qendrore e Spitalit Lushnje, godina e Maternitetit të Spitalit Shkodër, Materniteti i Spitalit Fier, Shërbimi i Patologjisë në Spitalin Vlorë dhe rikonstruksion i godinës së djegie-plastikës në QSUNT.
Sala tha se “MSHMS aktualisht është në përmbyllje të projektpreventivave të zbatimit për 106 objekte qendra shëndetësore dhe ambulanca të cilat do të rehabilitohen për vitet 2026-2028”.
/e.i/r.e/