Salla: Projekte të reja me Gjermaninë që mbështesin zhvillimin e bujqësisë
TIRANË, 4 nëntor /ATSH/ Ministri i Bujqësisë dhe Zhvillimit Rural, Andis Salla, zhvilloi një takim me prof. Eberhard Haunhorst, drejtor i përgjithshëm për Sigurinë Ushqimore në Ministrinë Federale të Ushqimit dhe Bujqësisë së Gjermanisë.
Salla tha se gjatë takimit u diskutua për ecurinë dhe rezultatet e bashkëpunimit teknik gjerman nëpërmjet GIZ-it, si dhe për projektet që po kontribuojnë në modernizimin e bujqësisë shqiptare.
Ministri vlerësoi kontributin e GIZ-it në forcimin e kapaciteteve institucionale, përmirësimin e standardeve të prodhimit dhe sigurisë ushqimore, si dhe përafrimin me politikat e Bashkimit Europian.
Ai theksoi se projektet si “Zhvillimi i Qëndrueshëm Rural (SRD)” kanë pasur një impakt të rëndësishëm në nxitjen e inovacionit dhe mbështetjen e fermerëve e agropërpunuesve shqiptarë.
Nga ana e tij, prof. Haunhorst vuri në dukje bashkëpunimin e ngushtë midis institucioneve shqiptare dhe atyre gjermane, duke theksuar gatishmërinë për të vijuar me projekte të reja që do të mbështesin zhvillimin e qëndrueshëm të sektorit bujqësor në Shqipëri.
“Bashkëpunimi mes Shqipërisë dhe Gjermanisë do të vazhdojë të jetë një mbështetje e qëndrueshme për përmirësimin e prodhimit vendas, forcimin e sigurisë ushqimore dhe përgatitjen e vendit për integrimin në tregun e përbashkët europian. Ky takim konfirmon përkushtimin e përbashkët për një bujqësi moderne, konkurruese dhe në përputhje me standardet e BE-së”, deklaroi Salla.
/e.xh/j.p/r.e/