“Salla e banjës”, aty ku femrat flasin për meshkujt

Hajrie Rondo një nënë 60-vjeçare, e ve, jeta e së cilës vërtitet rreth lumturisë së të bijës, e cila nuk pajtohet me mënyrën sesi kjo rini e shikon dhe e kërkon të ardhmen. Ajo gjendet në një merak të vazhdueshëm për të ardhmen e vajzës së saj. Vajza e saj është 30 vjeçe, në kërkim të dashurisë dhe njeriut ideal. Një tjetër 30-vjeçare, e martuar dhe nënë e dy fëmijëve, që përjeton tradhtinë e bashkëshortit. Më tej një tjetër 30-vjeçare, që e gëzon jetën në mënyrën më të lirë të mundshme. Që hidhet sa në krahët e një lidhjeje te një tjetër, por që mëmësia e vë përballë një fati të pashmangshëm. Panoramës së personazheve nuk mund t’i mungonte lozonjarja 22- vjeçare që dëshiron të marrë nga rinia e saj më të mirën, pa e vrarë mendjen për cilësinë e lidhjeve sentimentale që krijon. Janë këto histori njerëzore që ndërthuren në komedinë “Salla e banjës”, e autores Astrid Veillon, që do të vijë sot më 8 mars, nën regjinë e Inis Gjonit. “Është zgjedhur pikërisht data 8 mars, dita e femrës, çka simbolizon jo pak edhe veprën në fjalë”- u shpreh regjisorja Gjoni në prezantimin e veprës, që vjen premierë në sallën e vogël të Teatrit Kombëtar. Ndërsa për aktoren Hajrie Rondo, e cila ka në krah në këtë komedi dhe vajzën e saj, kjo shfaqje flet për të gjitha gratë. “Kjo shfaqje ёshtё njё pikё referimi pёr gratё, ku secila mund të gjejë veten”- u shpreh aktorja me përvojë e skenës së teatrit. Pesë gratë e shohin qenësinë jetës së tyre në këndvështrime të ndryshme. Në fakt, Loluja është personazhi kryesor i kësaj vepre, por po kaq të rëndësishëm janë edhe personazhet e tjera dhe historitë e tyre. Ngjarja zhvillohet në ditët e sotme. Lolu është një vajzë e cila mbush 30 vjeç. Ajo ka vendosur të festojë ditëlindjen me miken e saj më të ngushtë, por edhe me shoqërinë e saj të zgjeruar. Pikërisht në ditën e datëlindjes nisin dhe zbulohen të thënat apo dhe pak të thënat e 4 shoqeve të ngushta në raportet e vërteta të tyre me meshkujt. Ndoshta për t’i dhënë tone “serioze” bisedave femërore rreth seksit të kundërt apo për t’i ironizuar ata, autorja e zhvendos gjithë bashkëbisedimin në një mjedis banjoje. Ndërsa festa nis në shtëpinë e Lolusë, hapësira më intime për vajzat bëhet banjoja, ku 4 mikeshat nisin të flasin, të zbulojnë dhe të sqarojnë jetët e tyre. Ndërsa Maria është nëna e dy fëmijëve, bashkëshorte e devotshme, e vetmja ndër shoqet që është e martuar, por e pakënaqur nga martesa e saj. Enxhi, një vajzë shumë simpatike, por dhe shumë feministe, pak mashkullore në qëndrimin e saj. Koko një tjetër mikeshë e vajzave, më e reja nga shoqet e saj, vetëm 20 vjeç. Është tepër e përkëdhelur, por që deziluzionin nga meshkujt ajo e ka prekur shumë herët, pasi në pjesën më të madhe asaj i është dashur të lidhet me burra të martuar dhe për këtë zgjedhje ia vë fajin meshkujve. Në këtë atmosferë festive në dukje nisin dhe shfaqen shqetësimet, dëshirat, përpjekjet, kontradiktat, zhgënjimet e fshehta shpirtërore, tradhtitë dhe humbjet nga mosvendimet në kohën e duhur. Të gjitha këto orvatje vijnë si përpjekje për të gjetur bashkëshortin ideal dhe babanë e duhur të fëmijëve. Por a munden ato ta gjejnë në perimetrin e ngushtë të një banjoje? Në fakt, ideja e skenografisë së Beqo Nanajt është pikërisht kjo. Spektatorët ndoshta do të gjenden paksa të sikletosur kur përballë tyre të shfaqet një tualet femrash me të gjitha “mobiliet” e duhura, që nga dushi dhe vaska në qendër të skenës, pasqyra ku ato shohin veten teksa flasin për burrat, deri te një biçikletë sportive që është bërë pjesë e skenografisë, ndoshta për t’i ardhur në ndihme skenarit sesa vetë dekorit. Komedia “Salla e banjёs” ёshtё premiera mё e re e Teatrit Kombёtar. Kjo komedi e Astrid Veillos, vjen me regji tё Inis Gjonit dhe interpretimin e Hajrie Rondos, Marsela Lena, Klea Konomi, Klara Shehu dhe Niada Saliasi. Shfaqja do të ngjitet në skenë thuajse gjatë gjithë javës, duke filluar që sot më 8 mars deri më 13 mars. Julinda Harrallambi ka menduar për kostumet dhe grimin, ndërsa regjisorja Julia Sinanaj tashmë ka ndryshuar profil në këtë vepër si producente.