Sanino: Vetëm me bashkëpunim mund të arrini integrimin në BE
Drejtori i Përgjithshëm për Zgjerimin në Komisionin Evropian, Stefano Sannino ka zhvilluar sot takime me drejtues të lartë të shtetit shqiptar.
Sannino ka mbajtur takim me presidentin Topi, kryeministrin Berisha dhe ministrin e Jashtëm Haxhinasto.
Në takimin me Berishën, ai i ka kujtuar këtij të fundit se KE po ndjek me vëmendje reformat që janë nisur me konsensusin mazhorancë-opozitës.
Ndërsa në takimin që Sannino pati me Topin është theksuar domosdoshmëria e arritjes së rezultateve konkrete nëpërmjet gjetjes së bashkëpunimit pasi vetëm në këtë mënyrë mund të realizohen projektet e së ardhmes evropiane.
* * *
Drejtori i Përgjithshëm i Zgjerimit në KE, Stefano Sanino, thekson se bashkëpunimi mes forcave politike është rruga që do ta çojë vendin drejt integrimit.
Pas takimit me zv.kryeministrin dhe ministrin e Jashtëm, Haxhinasto, Sanino u shpreh në një konferencë shtypi se viti 2012 është vit i rëndësishëm për integrimin e vendit në BE, ndaj forcat politike duhet të bashkëpunojnë për të çuar përpara reformat e nisura.
Forcat politike duhet të bashkëpunojnë pasi procesi i integrimit është gjtihëpërfshirës dhe vetëm kështu mund të çohet përpara axhenda e integrimit, tha Sanino.
Sanino vlerësoi si shembull të mirë të dialogut mes palëve zgjedhjen e Avokatit të Popullit dhe nisjen e punës për reformën zgjedhore.
Vlerësoj dialogun. Ka ndodhur emërimi i Avokatit të Popullit, i pranuar nga të gjitha palët, ishte një proces transparent. Ka filluar dialogu për reformën zgjedhore dhe për miratimin e ligjeve që kërkojnë shumicë të cilësuar. Duhet të vazhdohet në këtë rrugë, të ruani ritmin e reformave, është një vit shumë i rëndësishëm për Shqipërinë dhe të ardhmen e saj në Europë, theksoi Sanino.
* * *
Sanino pritet të takohet edhe me kryeministrin Berisha, kryetaren e Kuvendit, Jozefina Topalli, ministren e Integrimit, Majlinda Bregu,dhe anëtarët e komisionit parlamentar të integrimit.
Vizita e Saninos në vendin tonë pritet të nxisë palët politike për përmbushjen e 12 rekomandimeve të kërkuara nga BE-ja për marrjen e statusit të vendit kandidat.