Seancë dëgjimore në Kuvend, diskutime për projektligjin e të drejtave të autorit

Nën drejtimin e Kryetares Ina Zhupa, Komisioni për Kulturën, Turizmin dhe Diasporën është mbledhur për të vijuar me shqyrtimin dhe dëgjimin e grupeve të interesit lidhur me Projektligjin “Për disa shtesa dhe ndryshime në ligjin nr. 35/2016, ‘Për të drejtat e autorit dhe të drejtat e tjera të lidhura me to’, të ndryshuar”.

Seanca i ka kushtuar vëmendje të veçantë marrjes së mendimeve dhe sugjerimeve nga aktorët kryesorë të tregut të librit dhe krijimtarisë artistike, me qëllim përmirësimin e kuadrit rregullator të këtij sektori.

Në këtë mbledhje të komisionit të pranishëm ishin Arlinda Dudaj nga shtëpia botuese “Botimet Dudaj”, si dhe Rexhep Hida nga Shoqata e Përkthyesve.

“Komisioni zhvilloi një tjetër seancë dëgjimore me grupet e interesit për projektligjin,” thuhet në njoftimin zyrtar të mbledhjes, e cila vijoi me një sërë pyetjesh, diskutimesh dhe ndarje të shqetësimeve konkrete rreth ndryshimeve të propozuara ligjore mes deputetëve dhe përfaqësuesve të pranishëm.

/rtsh.al/