Sedloski: Duhet të luajmë mençur

Vllaznia përballet me Egnatian të mërkurën dhe për trajnerin Goçe Sedloski, humbja me Tiranën në kampionat nuk ishte përgatitja më e mirë, por që duhet lënë prapa.

 “Janë dy ndeshje që luhen dhe kjo është vetëm e para. Jemi pak në situatë negative për humbjen ndaj Tiranës. Kjo është gjysmëfinale e Kupës dhe duhet të kemi durim. Duhet të rrisim ritmin dhe të luajmë siç dua unë. Kemi bërë analizën e Tiranës se ku kemi gabuar. Lojtarët që dalin në fushë duhet të japin gjithçka për ndeshje dhe rezultat të mirë e ta kemi të lehtë në fushë të huaj. Pas 3 ditësh kemi kampionatin prandaj këto dy ndeshje duhet t’i luajmë në mënyrën më të mire”.

Trajneri maqedonas e ka paralajmëruar skuadrën për kundërshtarin që e pret në Kupë.

 “E kam ndjekur dhe parë Egnatian. Luajnë shumë mirë dhe kam parë që bëjnë futboll të bukur. Presin për rastin e kundërsulmit dhe kam thënë që duhet të pozicionohemi si duhet. Duhet të luajmë mençur dhe rezultati vjen”.

Me kampionatin tashmë larg mundësive reale për t’u arritur, për Vllazninë bileta e Evropës kalon nga Kupa dhe kreu i stolit kuqeblu e ka të qartë këtë.

 “Qëllimi është të kapim Evropën siç kam folur me klubin. E kam thënë që çdo ndeshje është e rëndësishme. Ashtu si duam ne Evropën, e do edhe Egnatia dhe ashtu jemi edhe në kampionat e jemi shumë afër. Do të jetë shumë interesante deri në fund. Duhet të mendojmë më vonë për ndeshje e ardhshme”.

Takimi i parë i vlefshëm për gjysmëfinalet e Kupës së Shqipërisë, Vllaznia-Egnatia, luhet të enjten, duke nisur nga ora 18:00, në Stadiumin “Loro Boriçi” të Shkodrës.