Sejko: Prioritet stabiliteti i çmimeve, inflacioni mbetet sfida kryesore

Komisioni i Ekonomisë dhe Financave zhvilloi seancën dëgjimore me Gent Sejkon, si kandidat për një mandat të dytë Guvernatori në krye të Bankës Qëndrore. Sejko shpalosi përballë deputetëve prioritetet e mandatit të dytë 7 vjeçar, ku kryefjalë kishte inflacionin e lartë.

“Është sfidë, çmimet do të rriten. Ne do të rishikojmë kahun e politikës monetare, qeveria ka planet e saj për politikën fiskale. Rritja e çmimeve është sfida kryesore e ekonomisë. Lufta në Ukrainë e implikon këtë situatë, ndikimi. Duhet të jemi alert me inflacionin… Rritja e çmimeve dhe kalimi i efekteve të pandemisë janë faktorët e rrezikut për 2022, ”tha Sejko.

Si rrallë herë, kandidatura e Sejkos ka marrë pëlqimin e të gjitha palëve politike në vend me vlerësime të larta për mandatin e tij të parë në krye të Bankës së Shqipërisë. E vetmja vërejtje erdhi nga deputetja demokrate Sorina Koti.

Gent Sejko ka arritur të marrë mbështetjen e nevojshme për një mandat të dytë në krye të Bankës së Shqipërisë. Formula e përcaktuar në ligj kërkon dakordësi mes Presidentit dhe shumicës parlamentare.

Pas dekretit të Presidentit Meta, Parlamenti pritet ta votojë këtë të enjte Gent Sejkon si Guvernator të Bankës Qëndrore për 7 vitet e ardhshme.