Sequi dhe Wollfarth: Mirëpresim debatin, koha për dialog

TIRANË Për Ambasadorin e OSBE-së në Tiranë, Eugen Wollfarth, dhe shefin e delegacionit të Komisionit Europian në Tiranë, Etore Sequi, dialogu në Shqipëri është mëse i domosdoshëm. Duke iu referuar ftesës së kryetarit të PS-së, Edi Rama, për një debat publik mes tij dhe Berishës për çështjet që shqetësojnë vendin, ambasadori i OSBE-së ka deklaruar se dialogu është i rëndësishëm, duke theksuar se po aq i tillë është edhe brenda Kuvendit. Duke e konsideruar idenë e Ramës si shumë të mirë, ambasadori i OSBE-së tha se mbështet dhe mirëpret çdo ofertë që sjell dialog dhe mirëkuptim mes palëve. "Dialogu është shumë i rëndësishëm, sidomos kur bëhet brenda Parlamentit. Duhen diskutuar hapat e ardhshëm për reformat e Kodin Elektoral. Dialogu është i mirë në çdo formë, por nuk duhet vendosur si kusht. Është shumë e rëndësishme të bëhet ky debat e dialog. Por duhet të përfshijë dhe atë në Parlament mes partive. Është një hap që duhet hedhur, sigurisht. Pjesë e këtij debati duhet të jetë dhe rregullorja",- tha Wollfarth. Pak orë më vonë erdhi edhe reagimi i ambasadorit të BE-së në Tiranë, Sequi. Në një intervistë televizive, Sequi ka deklaruar se mirëpret idenë për një debat publik. Ai ka theksuar se është koha që palët të ulen në dialog.