Serbia i kthehet sindromës së Milosheviçit

Serbia ka hedhur poshtë me vendosmëri shpalljen e pavarësisë nga Kuvendi i Kosovës.
Ndërsa në Prishtinë ishte në përfundim e sipër ceremonia e shpalljes së pavarësisë, në Beograd si kreu shtetëror i Serbisë, presidenti Boris Tadiq, dhe kryeministri Vojisllav Koshtunica, përsëritën se Serbia vendosmërisht e përgjithmonë i kanë anuluar të gjitha vendimet për shpalljen e pavarësisë. Kryeministri serb Koshtunica tha se pavarësia e njëanshme dhe të gjitha aktet e ardhshme të Kosovës do të quhen "vendime antijuridike". Ai fajësoi për këtë atë që ai e quajti "politikë destruktive, të egër e jomorale që zbatojnë Shtetet e Bashkuara". "Duke vënë dhunën mbi parimet e të drejtës ndërkombëtare, Shtetet e Bashkuara të Amerikës me zbatimin e forcës së verbër nënçmuan dhe detyruan Bashkimin Evropian të shkelë parimet mbi të cilat mbështetet vetë BE-ja," tha zoti Koshtunica në një fjalim televiziv që u ndoq edhe nga disa dhjetra serbë në disa rajone të Kosovës. "Evropa sot uli kokën dhe prandaj edhe ajo do të jetë përgjegjëse për të gjitha pasojat afatgjata që kjo dhunë do të ketë për rendin evropian dhe botëror," tha kryeministri serb. Zoti Koshtunica tha se SHBA dhe aleatët e tij evropianë "do të shkruhen me germa të zeza në historinë e Serbisë dhe çdo histori e së drejtës ndërkombëtare dhe e rendit botëror të mbështetur mbi të". Ndërkaq edhe presidenti Boris Tadiq, në një deklaratë me shkrim ka theksuar se Serbia kurrë nuk do të njohë pavarësinë e Kosovës. Sipas tij, shteti serb nuk do të ndërmarrë hapa të ngutshëm, ndërkohë që nga UNMIK-u dhe KFOR-i zoti Tadiq ka kërkuar shkallën më të lartë të sigurisë për serbët. Edhe Tadiq edhe Koshtunica kanë lënë të kuptohet se Kosovën, pavarësisht vendimit të sotëm, do të vazhdojnë ta shohin e ndjejnë pjesë të Serbisë. Në Beograd është konfirmuar edhe zyrtarisht fillimi i protestave në mbarë Serbinë. Radikalët kanë kërkuar që së shpejti në Beograd të organizohet një protestë e përbashkët të partive qeverisëse dhe të opozitës. Menjëherë pas fjalimit të kryeministrit Koshtunica një grup qytetarësh është mbledhur përpara ambasadës amerikane në Beograd. Midis ndërtesës dhe protestuesve që kritikonin politikën amerikane ndaj Kosovës, ishte vendosur një kordon policësh. Kabineti i presidentit të Serbisë të dielën në mbrëmje ka njoftuar se presidenti Tadiq niset për në Nju Jork ku do të asistojë në mbledhjen e jashtëzakonshme të Këshillit të Sigurimit të OKB-së.
Granata edhe kundër zyrave të BE-së e OKB-së në Mitrovicë/Granata dore u hodhën kundër zyrave të Bashkimit Europian dhe Kombeve të Bashkuara dje në qytetin e Mitrovicës, pasi Kosova shpalli pavarësinë me mbështetjen e BE-së. Nuk ka dëmtime nga shpërthimi i granatës, bëri të ditur një burim perëndimor në qytet. Zyrtarë të Bashkimit Europian u larguan nga ndërtesa.
Nacionalistët serbë boshnjakë kërcënojnë për shkëputje/Një grup nacionalist serb boshnjak paralajmëroi të enjten se do të shtyjë që Republika Srpska (RS) të shpallë pavarësinë nga Bosnje dhe Herzegovina (BiH) po qe se Kosova shkëputet nga Serbia. "Në qoftë se Kosova shpall pavarësinë, ne do të kërkojmë pavarësi për Repubikën Serbe po ashtu," tha kryetari i Lëvizjes Serbe të Shoqatave të Pavarura (SPONA) Branislav Dukiç në një konferencë shtypi në Banja Luka. Në rast se ndonjë ish republikë jugosllave njeh deklarimin e njëanshëm që ligjbërësit e Prishtinës pritet të miratojnë të dielën, autoritetet e RS duhet të marrin hapa për të rifituar të gjitha pushtetet e transferuara nga niveli i njësisë në atë shtetëror në vitet e fundit, tha ai. Duke cituar burime diplomatike, e përditshmja maqedonase Utrinski Vesnik raportoi të premten se Shkupi do ta njihte pavarësinë e Kosovës brenda tre javësh të shpalljes së saj. Kroacia tregoi këtë javë se do të ndiqte politikën e BE në këtë çështje por nuk do të ishte midis të parave që njoftonte njohjen e shtetit që lind. Sllovenia, e cila mban aktualisht presidencën e radhës të BE, është midis grupit të vendeve anëtare të bashkimit 27-vendesh që kanë sinjalizuar gatishmërinë e tyre për të njohur një Kosovë të pavarur pa miratimin e OKB-së. Në qoftë se BE merr këtë masë "kundër ligjit ndërkombëtar", parlamenti i RS duhet të deklarojë pavarësinë e njësisë pa një referendum, tha kreu i SPONA e cila përbëhet nga disa grupe veteranësh serbë boshnjakë. "Në qoftë se parlamenti i paligjshëm i Kosovës mund të deklarojë pavarësinë, nuk ka arsye pse parlamenti i ligjshëm i Republika Srpska të mos e ketë atë të drejtë," Reuters e citonte Dukiç. Një tjetër grup nacionalist, Zgjedhja është Juaja, është thënë se gjithashtu po bën plane të shtyjë ligjbërësit e RS për të ndjekur shembullin e Kosovës. Përveç kësaj, ai po premton të ngrejë protesta paqësore po qe se krahina shkëputet nga Serbia. Kryeministri i RS Milorad Dodik, i cili është kritikuar për deklarime të ngjashme shkëputëse në të kaluarën, tha të enjten se njësia do të gjykojë "me shumë kujdes" reagimin e saj ndaj shpalljes së pavarësisë nga Kosova. "Në rast të një shpalljeje të njëanshme të pavarësisë së Kosovës, të tjerë mundet gjithashtu të zhvillojnë ide të tilla," shtoi ai. Gjëja më e rëndësishme, tha Dodik, është të mbahet paqja dhe siguria në RS. Ai theksoi gjithashtu se qeveria e tij do të bllokonte çdo përpjekje që BiH të njihte Kosovën si një shtet të pavarur. I dërguari i lartë ndërkombëtar në BiH, Përfaqësuesi i Lartë Miroslav Lajçak ka theksuar në mënyrë të përsëritur se Marrëveshja e Paqes e Dejtonit e cila i dha fund konfliktit të 1992-1995, garanton integritetin territorial të BiH dhe nuk parashikon për ndryshime kufijsh. "Republika Srpska nuk ka të drejtë të shkëputet nga Bosnja, në të njëjtën kohë, askush nuk mundet njëanshmërisht të shfuqizojë Republika Srpska," tha Lajçak kohët e fundit. Përpara shpalljes së pritur të pavarësisë së Kosovës, forcat policore në RS filluan përgatitjet këtë javë për t'u marrë me një përshkallëzim potencial të tensionit në njësi. "Policia është në alarm me një numër të mjaftueshëm policësh me qëllim që të reagojë ndaj çdo trazire dhe dhune të mundshme," citoi AFP kreun e administratës së policisë penale të ministrisë së brendshme, Gojko Vasiç të thoshte të premten. "Ne nuk presim ndonjë trazirë të madh, por në qoftë se do të ketë protesta, policia do t'i sigurojë këto veprimtari siç duhet".