Shamku: Qeveria po pushon mësuesit
Tiranë, 7 mars, NOA Partia Socialiste ka zgjedhur ditën e 7 Marsit për të akuzuar qeverinë për largimet nga puna të mësuesve. Deputetja e PS-së, Ledi Shamku, u shpreh se kjo qeveri po e kthen arsimin shqiptarë në stade primitive.
Kjo qeveri po pushon nga puna mijëra mësues, dhe po e kthen arsimin shqiptar në stad primitive, në një kohë kur bota ecën në binarët e Teknologjisë së Lartë. Ajo madje po i heq kuptimin dhe vlerën vetë dijes. Ky është 7 Marsi i akullt i Shqipërisë në krizë, e megjithatë ju vazhdoni të luftoni, tha Shamku.
Ajo theksoi se kombi u detyrohet shumë arsimtarëve për kontributin që japin në edukimin e brezave.
Sot ju falenderojmë ju edukatorë brezash, që vijoni ti jepni dinjitet e dituri bijve tanë, pavarësisht se kjo qeveri e dhunës e shkallmon përditë dinjitetin tuaj.
Ju falenderojmë ju arsimtarë, të vjetër e të rinj, që ja dilni të mbillni dijen në mendjet e fëmijve tanë e ti mbroni sa mundeni këto mendje nga dëmi i teksteve, alter-teksteve e pseudoteksteve që po prodhon injoranca e qeverive më regresive të këtyre dy dekadave, u shpreh Shamku .
m.xh/NOA