Shënojnë “të harruarit” kuqezi/ Tuci dhe Mersinaj realizojnë gola në Slloveni dhe Kroaci

Luajnë jo larg prej nesh. Po flasim për dy futbollistë shqiptarë, Indrit Tuci, dhe Jon Mersinaj, të cilët ishin protagonistë këtë fundjavë për ekipet e tyre.

Tuci në Slloveni dhe Mersinaj në Kroaci shënuan gola, ndonëse rezultatet nuk i patën njësoj.

Sulmuesi shkëlqeu me d gola në barazimin 3-3 që Olimpija e Ljubljanës arriti në shtëpi ndaj Murës Në Ligën e Parë sllovene.

Shqiptari I dha të vetëve epërsinë 2-0, me dy golat në minutat 31 e 52, por për fat të keq fitorja nuk u ruajt.

Tuci ka 3 gola në 6 javë kampionat, ende larg kreut të renditjes për Këpucën e Artë, por nëse vazhdon me këtë ritëm, mund ta pretendojë suksesin.

Mersinaj, ndërkaq, po nis të luajë në Ligën e Parë të Kroacisë, dhe kjo falë huazimit tek Slaven Belupo, pasi nuk pati minuta në Osijek.

Ai e festoi ndeshjen e tretë, si I huazuar në ekipin e ri, duke shënuar në fitoren e madhe në shtëpi ndaj Rijekës.

Ish-kampionia, një nga tre klubet më të pasur në Kroaci, bashkë me Dinamon e Zagrebit dhe Hajdukun, kryesoi herët, por pastaj mbrojtësi 27-vjeçar shqiptar barazoi në 35’.

Pas pushimit, vendasit arritën një sukses të famshëm, me shifrat 4-1, për të cilin do të flitet gjatë dhe pjesë ishte edhe ish-lojtari I Lokomotivës së Zagrebit, që ka luajtur një herë për kombëtaren.