Shpërthimi, Koka: Ngjarja me sfond politik

TIRANË- Ngjarje shumë të rëndë me sfond të qartë politike, në prag të fushatës për zgjedhjet e 8 majit. Kështu e ka quajtur shpërthimin e ndodhur në banesën e tij, kandidati i PS-së, për minibashkinë numër 7, Erion Koka.

Duke treguar për mediat dëmtimet e ndodhura në banesë pas shpërthimit të eksplozivit në mesnatë, ai përsërit të njëjtën gjë që i ka dëshmuar edhe policisë.

Kjo është një ngjarje shumë e rëndë, që lidhet patjetër me fushatën. Unë nuk kam pasur asnjë konflikt. E vetmja mundësi është ajo e fushatës elektorale kështu që çështja politike është mjaft e qartë- ka thënë ai për mediat.

Ngjarja ndodhi në orët e para të mëngjesit, kur ende nuk kishte zbardhur, rreth orës 03.00 të mëngjesit, ndërkohë që për fat në banesë nuk janë shënuar familjarë të lënduar.