Shqipëria, e 14-ta në botë për rritjen e PBB-së reale për frymë në 35 vite
TIRANË, 18 shtator/ATSH/ Shqipëria renditet e 14-ta në botë për rritjen e PBB-së reale për frymë gjatë 35 viteve të fundit, me një zgjerim prej 309% nga viti 1990 deri në 2025, sipas një analize të Visual Capitalist, bazuar në të dhënat e Bankës Botërore.
Sipas analizës, PBB-ja reale për frymë e Shqipërisë, e matur me paritetin e fuqisë blerëse (PPP), është rritur nga rreth 5.600 dollarë në vitin 1990 në rreth 22.700 dollarë në vitin 2025.
Rritja e Shqipërisë është dukshëm mbi mesataren globale, pasi PBB-ja reale për frymë në botë u rrit me rreth 94% gjatë së njëjtës periudhë, nga 11.300 në 21.900 dollarë.
Ecuria shqiptare ka qenë gjithashtu më e shpejtë se ajo e Maqedonisë së Veriut. Në vitin 1990, PBB-ja reale për frymë e këtij vendi ishte rreth 12.900 dollarë, ndërsa në 2025 arriti në 25.100 dollarë, me rritje prej 94%. Ndërkohë, diferenca mes dy vendeve është ngushtuar ndjeshëm gjatë periudhës.
Në krye të renditjes globale qëndron Guajana, me rritje prej 1.549%, e ndjekur nga Kina me 1.404%. Në listën e ekonomive me rritjen më të shpejtë përfshihen edhe Vietnami, India, Bangladeshi dhe Koreja e Jugut.
Në Europë, analiza veçon Bosnjë-Hercegovinën, me rritje prej 777%, ndërsa Irlanda regjistroi një rritje prej 345%. Për këtë të fundit, analiza nënvizon se treguesi i PBB-së për frymë ndikohet ndjeshëm nga aktiviteti i kompanive shumëkombëshe.
Ndër ekonomitë e zhvilluara, Shtetet e Bashkuara regjistruan rritje prej 73% të PBB-së reale për frymë gjatë periudhës 1990-2025, ndërsa rritja ishte 61% në Mbretërinë e Bashkuar, 48% në Gjermani, 43% në Kanada dhe Francë dhe 34% në Japoni.
Të dhënat tregojnë se Shqipëria ka pasur një ritëm të lartë konvergjence gjatë 35 viteve të fundit, megjithëse niveli absolut i PBB-së për frymë mbetet një tregues i veçantë nga ritmi i rritjes.
/e.xh/j.p/r.e/