”Shqipëria pret me besim marrjen e statusit të vendit kandidat në BE”

Presidenti i Republikës mban një fjalim në Asamblenë Parlamentare të Këshillit të Evropës, në Strasburg

Presidenti Nishani zhvilloi një takim edhe me Sekretarin e Përgjithshëm të Këshillit të Evropës, Thorbjørn Jagland

Presidenti i Republikës, Bujar Nishani, deklaroi dje në Asamblenë Parlamentare të Këshillit të Evropës në Strasburg, se Shqipëria pret me besim marrjen e statusit të vendit kandidat për në Bashkimin Europian.
Nishani, në fjalën e tij mbajtur në këtë Asamble, vuri në dukje se vendi ka ndryshuar rrënjësisht këto 22 vite demokraci, duke bërë që ekonomia shqiptare të shndërrohet sot në një ekonomi tërësisht dinamike të tregut të lirë.
“Dikur, një vend tërësisht i izoluar, Shqipëria tashmë pret me besim marrjen e statusit të vendit kandidat në Bashkimin Evropian, bazuar në meritë, ndërsa qytetarët shqiptarë, lëvizin të lirë, pa viza në Evropë. Vendi  përballoi ndikimin e krizës globale ekonomike dhe financiare, duke shfaqur një rritje pozitive ekonomike dhe financiare, rrjedhojë e politikave të matura makro-ekonomike, reformave të mirëstrukturuara, liberalizimit të tregtisë, klimës së sipërmarrjes dhe një sërë reformash të tjera të guximshme të ndërmarra në këtë sektor”, tha Nishani.
Ai theksoi se, ajo që pritet nga autoritetet shqiptare është rritja e nivelit të standardeve, ndërsa shtoi se qeveria është tërësisht e angazhuar për përmirësimin e vazhdueshëm të tyre, për t`u integruar denjësisht në familjen evropiane.
“Shqipëria po feston 100-vjetorin e pavarësisë së saj. Të shumta kanë qenë përpjekjet e kombit shqiptar për të ruajtur ekzistencën e tij kundër copëtimeve, spastrimeve etnike dhe pushtimeve të ndryshme. Por sot, festojmë 100-vjetorin e pavarësisë së Shqipërisë si një komb i lirë, që ka ditur të shfrytëzojë vlerat e lirisë me arritje konkrete. Presidenca e Komitetit të Ministrave është qershia në tortën e 100-vjetorit të pavarësisë së vendit tim”, shtoi Nishani.
Kreu i shtetit theksoi ndër të tjera se për Shqipërinë, bashkëpunimi rajonal shkon përtej vetëm shprehjes së vullnetit politik të fqinjësisë së mirë, pasi nëse të gjitha vendet angazhohen bashkërisht, atëherë mund të ndërtohet një infrastrukturë moderne e përbashkët rajonale.
Presidenti Nishani gjithashtu ka kërkuar anëtarësimin e Kosovës në Këshillin e Europës, duke shtuar se Republika e Kosovës është tashmë një realitet dhe një faktor stabiliteti në rajon, i cili ka hedhur poshtë çdo skepticizëm.
“Çështja e statusit dhe integritetit territorial janë kapituj të mbyllur. Ne jemi për një anëtarësim të Kosovës në Këshillin e Evropës, sepse vetëm në një rast të tillë qytetarët kosovarë do përfitonin maksimalisht nga standardet e Këshillit të Evropës dhe do të kishin akses në Gjykatën Evropiane të të Drejtave të Njeriut”, nënvizoi Nishani.
Sipas tij, Kosova, me mbështetjen e vendeve mike që e përkrahin, ka bërë përparime konkrete dhe ka hyrë në rrugën e konsolidimit shtetformues. Këtë fakt, vijoi ai, e dëshmoi edhe vendimi i fundit i Grupit Drejtues Ndërkombëtar për t`i dhënë fund pavarësisë së saj të mbikëqyrur. “Ky vendim nis një faqe të re në historinë e Kosovës, atë të funksionimit të saj si shtet plotësisht sovran dhe i pavarur”, theksoi ai.   

Nishani - Jagland
Gjatë qëndrimit të tij në Strasburg, Presidenti Nishani zhvilloi një takim edhe me Sekretarin e Përgjithshëm të Këshillit të Evropës, Thorbjørn Jagland.
Presidenti Nishani gjatë takimit u shpreh se partneriteti dhe bashkëpunimi me Këshillin e Evropës është një faktor kyç për suksesin e Shqipërisë në rrugën e reformave dhe integrimin evropian. Duke theksuar rëndësinë e madhe që ka Këshilli i Evropës në forcimin e demokracisë, sundimin e ligjit dhe mbrojtjen e të drejtave të njeriut, Nishani falënderoi zotin Jagland, për kontributin e tij personal nё procesin reformues të Këshillit të Evropës.
Ai e garantoi Jagland për angazhimin e Kryesisë shqiptare për të kontribuar gjatë mandatit të saj për arritjen e objektivave dhe prioriteteve themelore të Këshillit të Evropës.
Duke sjellë si shembull harmoninë fetare që ekziston në Shqipëri dhe sakrificat sublime të shqiptarëve, për të shpëtuar njerëzit e rrezikuar gjatë Holokaustit në Luftën e Dytë Botërore, Nishani u shpreh se Shqipëria ka çfarë të ofrojë në realitetin multikulturor evropian, ndaj dhe motoja e Presidencës së saj në Komitetin e Ministrave të Këshillit të Evropës, është “Të bashkuar në diversitet”.
Presidenti kërkoi nga zoti Jagland që Këshilli i Evropës të jetë edhe më i angazhuar në Kosovë, për të kontribuar që zhvillimi i demokracisë dhe konsolidimi i institucioneve të së drejtës të jenë në standardet e mishëruara nga kjo organizatë.
Sekretari i Përgjithshëm i Këshillit të Evropës vlerësoi me nota shumë pozitive ecurinë e reformave gjatë Presidencës shqiptare të Këshillit të Evropës dhe u shpreh se kjo është shprehje e maturisë së institucioneve shqiptare.
Ai shprehu bindjen se Konferenca e Nivelit të Lartë që do të zhvillohet në Shqipëri në datat 8-9 nëntor 2012 do të jetë kurorëzim i Presidencës shqiptare dhe se Shqipëria do të japë kontributin e saj edhe ndaj presidencës së radhës.