Shqiptarët e Luginës do bojkotojnë zgjedhjet serbe

Kryetari i Komunës së Preshevës, Ragmi Mustafa, u ka bërë thirrje të gjithë votuesve shqiptarë të bojkotojnë zgjedhjet parlamentare dhe presidenciale të Serbisë.

“Unë përsëri, tani edhe zyrtarisht, u bëj thirrje të gjithë shqiptarëve që më 6 maj të bojkotojnë zgjedhjet parlamentare dhe presidenciale serbe, sepse qeveria qendrore në Beograd me vite nuk po tregon se është e interesuar për ndryshimin e pozicionit të shqiptarëve në Luginën e Preshevës”, ka thënë Mustafa në një tubim të Partisë Demokratike Shqiptare në Shtëpinë e Kulturës në Preshevë.

Ai po ashtu ka thënë se shqiptarët e Preshevës, Bujanocit dhe Medvegjës, çështjen e fatit të tyre duhet ta zgjidhin në Prishtinë dhe Tiranë, sepse një mënyrë e tillë, sipas tij, është rruga më e shkurtër drejt Bashkimit Evropian.

“Evropa dhe Bashkimi Evropian kanë qenë dhe janë qëllimet tona. Ato do t`i realizojmë më shpejt dhe më me sukses nëse zgjidhjen e fatit tonë e kërkojmë në Prishtinë dhe Tiranë”, ka thënë udhëheqësi i PDSH-së në Preshevë.

Më herët është raportuar se katër nga gjashtë parti shqiptare në Luginë do të marrin pjesë në zgjedhjet parlamentare serbe me listën “Koalicioni i Shqiptarëve të Luginës së Preshevës”.