Shumë seks për t’u shfaqur në Indi

Filmi triler i nominuar për Oscar ‘The Girl with the Dragon Tattoo’ nuk do të shfaqet në Indi pasi regjisori David Fincher refuzoi të presë skena që shfaqin dhunë dhe marrëdhënie seksuale.

Bordi Qendror i Certifikimit të Filmit i Indisë ka insistuar që të priten pesë skena, përfshirë dy në të cilën aktorët Daniel Craig dhe Rooney Mara bëjnë dashuri dhe një tjetër në të cilën personazhi i Mara-s Lisbeth Salander dhunohet nga kujdestari i saj ligjor, raportojnë mediat.

Fincher ka refuzuar të bëjë ndryshime në filmin e tij dhe kompania Sony Pictures i ka braktisur planet për premierën e 10 shkurtit.

“Sony Pictures nuk do ta lansojë filmin ‘The Girl with the Dragon Tattoo’ në Indi”, thuhet në një deklaratë të lëshuar nga zyrat e kompanisë në Mumbai. “Bordi i censorëve e ka vlerësuar filmin si të papërshtatshëm për shikim publik në formën e tij të pandryshuar dhe derisa ne jemi të përkushtuar të mbajmë dhe të ruajmë vizionin e regjisorit, ne, si gjithmonë, do të respektojmë udhëzimet e vëna nga bordi”.

‘The Girl with the Dragon Tattoo’, adaptimi i dytë i librit të parë të trilogjisë ‘Millennium’ nga Stieg Larsson, nuk ka qenë ndonjë goditje e madhe në box-office por ka marrë pesë nominime për Oscar javën e kaluar.