Siguria e fluturimeve- Testet e drogës dhe të alkoolit për pilotët dhe kontrollorët e trafikut ajror, ndryshime në rregulloren për personelin mjekësor të aviacionit

Janë publikuar dhe kanë hyrë në fuqi ndryshimet e reja të rëndësishme në rregulloret e aviacionit civil, të cilat pritet të forcojnë më tej standardet e sigurisë. Këto ndryshime, prekin kryesisht fushën e certifikimeve aeromjekësore, si dhe mbikëqyrjen e profesionistëve shëndetësorë që merren me ekuipazhet ajrore.

Në thelb, ndryshimet synojnë të rrisin nivelin e kontrollit dhe përgjegjshmërisë për ekzaminuesit mjekësorë të aviacionit (AME) dhe qendrat aeromjekësore (AeMC). Një nga pikat kyçe është forcimi i mbikëqyrjes së vazhdueshme, duke i dhënë Autoritetit të Aviacionit Civil (AAC) mundësinë të marrë në konsideratë faktorë si numri i AME-ve dhe vlerësimi i bazuar në rrezik i aktiviteteve të tyre.

Certifikatat për ekzaminuesit aeromjekësorë (AME) do të lëshohen, rivlerësohen ose rinovohen për një periudhë maksimale trevjeçare. Më parë, periudha mund të ketë qenë më e gjatë, por ky ndryshim synon rishikime më të shpeshta për të garantuar standardet më të larta.

AAC-së i jepet autoriteti i plotë për të kufizuar, pezulluar ose revokuar një certifikatë AME nëse konstatohen mosrespektime të kërkesave.

Kjo masë do të merret edhe në rast se aktiviteti i një AME-je mund të ketë një “ndikim negativ të drejtpërdrejtë ose të tërthortë në sigurinë e fluturimit.” Kjo thekson se siguria e pasagjerëve është prioriteti absolut.

“Një pikë tjetër e rëndësishme është bashkëpunimi ndërkombëtar. Në rastet kur një AME ose AeMC kryen aktivitetin e saj jashtë Shqipërisë, AAC do të sigurojë shkëmbimin e informacionit me autoritetet kompetente të shteteve të tjera, duke garantuar një mbikëqyrje të plotë dhe të unifikuar.”, thuhet në Udhëzim, shkruan rtsh.al.

Ndryshimet përcaktojnë gjithashtu se çdo qendër AeMC duhet të ketë në stafin e saj një AME përgjegjës dhe një numër të mjaftueshëm AME-sh të tjerë, me privilegjet e duhura për të lëshuar certifikata mjekësore për pilotët dhe kontrollorët e trafikut ajror. Gjithashtu, AeMC-të detyrohen të ofrojnë raporte statistikore mbi vlerësimet aeromjekësore, përfshirë testet e drogës dhe alkoolit.

Këto rregulla të reja duket se pasqyrojnë një përpjekje për të harmonizuar kuadrin ligjor shqiptar me standardet evropiane dhe ndërkombëtare të aviacionit civil, të cilat udhëhiqen nga parimi i sigurisë maksimale. Për profesionistët e fushës, këto ndryshime kërkojnë përditësim të vazhdueshëm dhe respektim strikt të rregullave të reja.

Për publikun e gjerë, këto ndryshime shërbejnë si një garanci se personeli i aviacionit që kujdeset për shëndetin e pilotëve dhe ekuipazhit, i nënshtrohet një procesi të rreptë kontrolli dhe certifikimi, duke e bërë udhëtimin ajror sa më të sigurt.

/rtsh.al/