Sillnin heroinë nga Turqia, arrestohet tre kosovarë

Arrestohen tre të dyshuar për krim të organizuar, blerje, posedim, shpërndarje dhe shitje të paautorizuar të narkotikëve të rrezikshëm dhe substancave psiko-tropike

Drejtoria për Hetimin e Trafikimit me Narkotikë, pas hetimeve gjashtëmujore, mbrëmë, rreth orës 19:00, në Prishtinë ka ndaluar tre persona nën dyshimin se janë duke bërë shitblerje të substancave narkotike të llojit heroinë.

Gjatë kontrollimit të tyre në xhepin e rrobave të njërit nga të dyshuarit është gjetur një sasi e pluhurit të dyshuar, më pas një sasi tjetër e pluhurit të heroinës është gjetur në veturën e njërit të dyshuar.

Me urdhër të gjyqtarit të procedurës paraprake është bërë kontrollimi i tri shtëpive të të dyshuarve.

Gjatë kontrollimit janë gjetur dhe janë konfiskuar: rreth dy kilogramë pluhur e dyshuar se është substancë narkotike e llojit heroinë, një armë automatike e tipit A-47 së bashku me 22 fishekë, një revole, 1 900 euro, dy vetura dhe prova të tjera materiale.

Bazuar në hetimet e zhvilluara dyshohet se të dyshuarit kanë vepruar si grup i organizuar dhe substanca narkotike është sjellë nga Turqia.

Inicialet e personave të arrestuar janë: F. M. 1972, B. XH. 1967 dhe
Z.G. 1967, që te tre shqiptarë të Kosovës.

Personave të dyshimtë, me urdhër të Prokurorisë së Qarkut në Prishtinë u është shqiptuar masa e ndalimit policor deri në 48 orë./Indeksonline/