Skandali i Peqinit, PS: Të përjashtohet Dash Sula nga parlamenti

Partia Socialiste ka dënuar sot  incidentin e një dite më parë në stadiumin e Peqinit në ndeshjen mes Shkumbinit dhe Flamurtarit (1-0), ku dyshohet se deputeti i Partisë Demokratike, Dashnor Sula ka qëlluar me pistoletë në ajër.

Në një deklaratë për median, deputeti i partisë socialiste Fidel Ylli ka deklaruar: Për mua është e pakonceptueshme si ky njeri, pa dashur ti vë epitete, shkon dhe bën një sjellje të tillë skandaloze të përsëritur nëpër stadiume një ditë më parë dhe të nesërmen, vesh kostumin e vjen midis nesh në Parlament, në Komisionin e Sigurisë dhe përfaqëson popullin shqiptar. Për mua, është e pakonceptueshme se si zonja Kryetare e Parlamentit apo zoti Kreministër nuk e ka thirrur asnjëherë këtë deputet e as nuk e kanë dënuar ndonjëherë këtë sjellje të tillë të turpshme.

Më tej deputeti Fidel Ylli tha se, deputeti Dashnor Sula dhunon gjyqtarët, arbitrat, gazetarët, gjithçka që i del përpara, duke prishur imazhin e tij si deputet dhe imazhin e qytetit të Shkumbinit, qytetarët e të cilit janë dashamirës ndaj sportit dhe që kanë nxjerrë edhe kampionë.

Duke e vënë theksin tek raste te përsëritura të dhunës në stadiume nga deputeti Sula, Ylli shprehi habi që kryeministri, Sali Berisha dhe kryetarja e Kuvendit, Jozefina Topalli nuk e kanë thirrur ndonjëherë deputetin për të sqaruar rastet.

Unë habitem me kryetaren e parlamentit, që pretendon të bëhet edhe presindente, që nuk e ka thirrur ndonjëherë këtë deputet, që ka mbi 4-5 raste që krijon dhunë në stadiume. Habitem me kryeministrin që na flet për 12 prioritetet, si nuk e thërret këtë deputet. Habitem me grupin parlamentarë që nuk mban një qëndrim mbi këtë deputete.- tha Ylli.

Ylli ka cilësuar si mashtrime ordinere deklaratat e Sulës, ku ai mohon lajmn dhe e konsideron atë thashethem. Sipas Yllit  nëse ai nuk do të ishte deputet, me gjithë këto raste të përsëritura dhune do të rrezikonte deri burgim të përjetshëm.