Skandali i korrupsionit në Ukrainë, Orbán sulmon Zelenskyn
Kryeministri hungarez Viktor Orbán ka sulmuar atë që e quajti “iluzioni i artë” i Ukrainës, në mes të një skandali korrupsioni prej 100 milionë dollarësh që përfshin kompaninë shtetërore të energjisë bërthamore, duke tronditur qeverinë e presidentit ukrainas Volodymyr Zelensky.
Orbán, aleat i ngushtë i presidentit amerikan Donald Trump, ka mbetur i izoluar nga aleatët evropianë në lidhje me luftën Rusi-Ukrainë dhe ka pasur përplasje të përsëritura me Zelensky-n.
Hungaria pengon Ukrainën të bashkohet me Bashkimin Evropian (BE) dhe akuzon Brukselin se po ushqen një luftë që duhet të ndalojë. Budapesti ka gjithashtu marrëdhënie të ngrohta me Moskën.
Korrupsioni ukrainas ka qenë shqetësim i madh për SHBA-në nën administratën Trump dhe një pikë kryesore e kritikave ndaj Zelenskyt.
Skandali i fundit kërcënon të dobësojë më tej mbështetjen publike amerikane për Ukrainën dhe besimin në udhëheqjen e Zelenskyt, duke rrezikuar ndihmën jetësore për mbrojtjen e saj kundër pushtimit rus.
“Iluzioni i artë i Ukrainës po shembet”, tha Orbán në një postim në X.
“Një rrjet mafie me lidhje të panumërta me presidentin Zelensky është zbuluar”, tha Orban.
Dy ministra të lartë të Zelenskyt, të Energjisë dhe Drejtësisë kanë dhënë dorëheqjen për shkak të skandalit.
Zyrtarë aktualë dhe ish-zyrtarë qeveritarë janë mes tetë personave të akuzuar nga autoritetet ukrainase të luftës kundër korrupsionit.
Sipas autoriteteve anti-korrupsion ukrainase, si Byroja Kombëtare Anti-Korrupsion (NABU) dhe Prokuroria e Specializuar Anti-Korrupsion (SAPO), skandali përfshin një skemë të madhe korrupsioni ku kontraktorët e kompanisë shtetërore bërthamore Energoatom u detyruan të paguanin ryshfete deri në 15% për të shmangur bllokimin e pagesave ose përjashtimin nga listat e furnitorëve.
Hetimi ka nisur që 15 muaj më parë dhe ka çuar në arrestimin e pesë personave, identifikimin e dy të tjerëve në arrati dhe akuzat ndaj tetë të dyshuarve për ryshfet, abuzim me detyrën dhe pasuri të pambuluara.
Mes tyre është Timur Mindich, bashkëpronar i studios së produksionit Kvartal 95 (ku Zelensky filloi karrierën si komedian) dhe aleat i ngushtë i tij, i cili ka ikur jashtë vendit. Ministri i Drejtësisë German Galushchenko (ish-ministër i Energjisë dhe zëvendëspresident i Energoatomit) dhe ministrja e Energjisë Svitlana Hrynchuk kanë dhënë dorëheqjen pas kërkesës së Zelenskyt.
Zelensky ka theksuar se Energoatom mbetet shtylla e sistemit energjetik ukrainas, veçanërisht në kushtet e sulmeve ruse të përsëritura ndaj infrastrukturës, që kanë shkaktuar ndërprerje të mëdha të energjisë.
Ky skandal vjen në një moment kritik për Ukrainën, ndërsa lufton kundër avancimeve ruse në front dhe kërkon më shumë ndihmë nga SHBA dhe BE.
/rtsh.al/