Spiropali takon Tajani-n, thellohet partneriteti Shqipëri-Itali për energjinë, infrastrukturën dhe investimet

Ministrja për Evropën dhe Punët e Jashtme e Shqipërisë, Elisa Spiropali, ka zhvilluar një takim me Zëvendëskryeministrin dhe Ministrin e Punëve të Jashtme të Italisë, Antonio Tajani. Takimi u cilësua si një “bisedë e hapur për miqësinë, partneritetin dhe të ardhmen që ndërtojmë bashkë.”

Spiropali bëri të ditur përmes një postimi në rrjetet sociale se bisedimet u fokusuan në forcimin e projekteve të përbashkëta në fusha strategjike, duke përfshirë:

Energjinë dhe interkonektivitetin.

Infrastrukturën digjitale dhe industrinë.

Investimet dhe sektorët me vlerë të shtuar.

Vizioni për Bashkëpunim dhe Integrim Evropian

Në postimin e saj, Ministrja theksoi rolin e Shqipërisë dhe Italisë për stabilitetin rajonal dhe integrimin evropian.

“Shtojmë rolin tonë në një rajon që kërkon më shumë bashkëpunim dhe më pak ndarje, si dhe angazhohemi bashkërisht për një Evropë më të bashkuar, më të drejtë dhe më të sigurt, ku Shqipëria duhet të jetë pjesë pa vonesë,” shkroi Spiropali.

Ajo përfundoi duke theksuar se kjo është një “miqësi që ka rrënjë të forta dhe vizion të përbashkët për të ardhmen,” duke e shoqëruar mesazhin me foto nga takimi.

Takimi mes dy diplomatëve konfirmon thellimin e marrëdhënieve dypalëshe në kontekstin e sfidave gjeopolitike dhe ekonomike.

/rtsh.al/