Strehimi i romëve, BE: Kemi dhënë 3 milionë euro, gjeni zgjidhje

Ambasadori i Bashkimit Evropian Ettore Sequi gjatë tryezës së organizuar nga Avokati i Popullit me ndërkombëtarët dhe aktorë të shoqërisë civile ditën e djeshme ka paralajmëruar edhe njëherë autoritetet shqiptare se situata e romëve do të pasqyrohet në progres raportin e Komisionit Evropian në tetor ndaj duhet bërë kujdes pasi një nga prioritetet për marrjen e statusit kandidat ka të bëjë pikërisht me respektimin e të drejtave të këtij komuniteti. Sequi u ka kërkuar gjithashtu llogari institucioneve shtetërore se BE, ka dhënë për rehabilitimin dhe integrimin e komunitetit rom rreth 3 milion euro dhe deri më tani familjet rome nuk mund të kenë as edhe një strehë për të qëndruar.

Paralajmërimi

Vetëm në Shqipëri që nga viti 2008, Bashkimi Evropian ka dhënë rreth 3 milionë euro për komunitetin rom, ndaj në këtë situatë nuk mund të raportojë për progres në këtë fushë ka deklaruar Sequi ditën e djeshme në fjalën e tij në tryezën e rrumbullakët për problemin e strehimit të familjeve rome. “Bashkimi Evropian është i përkushtuar në përfshirjen sociale dhe në respektimin e të drejtave të komunitetit rom dhe egjiptian. Natyrisht që situata e vështirë e këtij komuniteti, do të vlerësohet dhe pasqyrohet në raport-progresin që KE do të nxjerrë në mes të Tetorit dhe jemi ende në procesin e të shkruarit të këtij raporti”, tha Sequi.

Takimi për romët

Në takimin ditën e djeshme ku morën pjesë përfaqësues të Ojf-ve të ndryshme, por edhe specialistë të Ministrisë së Çështjeve Sociale dhe Shanseve të Barabarta, Prokurorisë, si dhe përfaqësues të organizmave ndërkombëtarë është diskutuar situata aktuale e romëve në Tirane dhe zgjidhja për strehimin 37 familjeve. Por, në këtë takim kanë munguar përfaqësues të Bashkisë së Tiranës, të cilët kanë për detyrë strehimin emergjent të komunitetit rom. “Ne shpresojmë që sa më shpejt të ketë bashkëpunim me bashkinë, me Ministrinë e Punës dhe Çështjeve Sociale, në mënyrë që të gjendet urgjentisht një zgjidhje e pranueshme dhe e qëndrueshme për qytetarët romë sepse gjendja është jo e mirë”, tha Totozani. Përfaqësuesja e Ministrisë së Shanseve të Barabarta tha se janë vënë në dispozicion 80 mijë dollarë për rikonstruksion e qendrës së Sharrës, por nga ana tjetër kujtoi dhe banesat sociale ndërtuar nga Bashkia e Tiranës në Shkozë, ku sipas saj familjet rome duhet të strehohen pa respektuar kriteret. Familjet rome kaluan një tjetër natë në qiell të hapur. Në pamundësi për të patur një strehë, kanë zgjedhur lulishtet e Tiranës, ku po qëndrojnë gra, burra dhe fëmijë të vegjël. Ndërkohë, alternativa e vetme e ofruar zyrtarisht per familjet rome si strehim, jane disa kazerma në periferi të Kombinatit, që dikur njihej si Reparti i Raketave. Ministria e Punës, Çështjeve Sociale dhe Shanseve të Barabarta ka bërë me dije se është fituar tenderi për rikonstruksionin e tyre dhe se për çështje ditësh nisin punimet.