Sulmet ndaj infrastrukturës energjetike, Irani paralajmëron: Do të hakmerremi shumë shpejt

Forcat e armatosura të Iranit kanë paralajmëruar se do të ndërmarrin veprime vendimtare në përgjigje të sulmeve ndaj infrastrukturës energjetike të vendit.

Autoritetet iraniane bëjnë të ditur se objektet në fushën e gazit në jug të vendit, kanë qenë në shënjestër.

“Armiku ka sulmuar një pjesë të infrastrukturës së karburantit dhe energjisë së Iranit në jug”, thuhet në deklaratën e ushtrisë.

Në reagimin zyrtar theksohet se çdo sulm ndaj sektorëve strategjikë do të pasohet me kundërpërgjigje të fortë.

“Siç është paralajmëruar më parë, nëse infrastruktura e karburantit, energjisë, gazit dhe ekonomisë së vendit tonë sulmohet nga armiku amerikan, përveç një kundërsulmi të fuqishëm, ne do të godasim rëndë edhe burimin e këtij agresioni”.

Deklarata shton se Irani e konsideron “legjitim” shënjestrimin e infrastrukturës energjetike të vendeve që, sipas tij, qëndrojnë pas sulmeve, duke paralajmëruar hakmarrje të shpejtë.

Televizioni shtetëror i Iranit raportoi gjatë ditës së sotme se, Izraeli dhe SHBA-të sulmuan sot objektet iraniane në Gjirin Persik, të cilat janë fushat më të mëdha të gazit në botë.