Sulmuan fizikisht agjentët e BKH, Gjykata lë në burg nipërit e ish kryetarit të bashkisë Mallakastër

Gjykata e Fierit ka lënë në burg Ledjan dhe Klaudjo Kapllanajn, dy nipërit e ish-kryebashkiakut të Mallakastrës, Agron Kapllanaj, së bashku me punonjësin e tyre, Gerald Kollçaku.

Të tre u njohën me masën e sigurisë pas incidentit të ndodhur pak ditë më parë, ku akuzohen se kanë sulmuar agjentë të Byrosë Kombëtare të Hetimit (BKH) dhe efektivë të Policisë së Shtetit.

Të dyshuarit kanë deklaruar në dëshmitë e tyre se nuk ishin në dijeni që personat të cilët kishin ndaluar dhe sulmuar ishin agjentë.

Ngjarja ndodhi kur një agjent i BKH-së, i shoqëruar nga efektivë të policisë, po zhvillonte një operacion me urdhër të SPAK-ut në fshatin Portëz e Madhe.

Sipas organit të akuzës, agjentët janë filmuar nga një person, çka i ka detyruar të ndërpresin operacionin dhe të zhvendosen në vendin e quajtur “Rrethrrotullimi i Parkut”. Në këtë vend, disa persona që mbërritën me tre automjete i janë afruar dhe i kanë sulmuar fizikisht.