Super atletet për maratona të “Nike” shiten deri në 700 euro

Super atletet “Nike”, të cilat kanë ndihmuar Kelvin Kiptum të vendosë rekord në distancën e maratonës kanë dalë një ditë më parë në shitje për publikun e gjerë. 

Modeli “Alphafly 3” u nxorr në shitje për 260 euro nga kompania e produkteve sportive amerikane, por brenda pak minutash në të gjitha platformat e shitjes ky model nuk gjendej më si pasojë e kërkesës së lartë.

Ata të cilët kanë arritur që të sigurojnë një palë kanë menduar që të përfitojnë në maksimum duke i rinxjerrë në shitje në “eBay” duke i vlerësuar 589 puand (682 euro).

Siç dihet në vitet e fundit kompanitë e artikujve sportivë kanë nisur një “betejë” të vërtetë në prodhimin e atleteve për garat e distancave të gjata. Teknologjia dhe materialet e përzgjedhura për t’i prodhuar kanë bërë që çmimet të rriten kaq shumë.