Superiore, ndahen në barazim sfidat Partizani-Teuta dhe Laçi-Elbasani

TIRANË, 22 gusht /ATSH/ Kanë përfunduar në barazim dy ndeshjet e luajtura sot pasdite, Partizani – Teuta dhe Laçi – AF Elbasani, të vlefshme për javën e parë të kategorisë Abissnet Superiore.

Partizani dhe Teuta e kanë nisur këtë edicion në Abissnet Superiore me një barazim pa gola të regjistruar mes tyre në stadiumin e Vorës.

Pjesa e parë dhuroi dy episode, ku fillimisht ishte një penallti e dhënë për durrsakët të cilën Kallaku e gaboi duke goditur shtyllën, e më pas një karton i kuq në fund për Hjumën i cili u ndëshkua pas një veprimi naiv.

Kjo bëri që Partizani të luante në mbrojtje dhe t’i lëshonte terrenin Teutës, e cila provoi të gjente golin sidomos me Umeijego e Pedro, por pa sukses.

Kështu të dyja skuadrat e mbyllën me një barazim pa gola këtë duel, i cili ishte i pari zyrtar për Bratu në pankinën e të kuqve dhe Tetovën në atë të durrsakëve.

Ndërsa ndeshja tjetër, ajo mes Laçit dhe Elbasanit u mbyll në barazim 1 me 1, në një përballje tepër të luftuar, teksa të dy golat u shënuan në pjesën e dytë.

Fillimisht ishte Hebaj që kthehu në gol në minutën e 56-të një penallti të fituar nga Boriçi, ndërkohë që supergoli i Orgi Cenas në minutën e 84-t, rikthehu baraspeshën.

Në minutën e katërt të shtesës, kurbinasit për pak sa nuk shënuan edhe golin e dytë, teksa gjuajtja e Bibos nga goditja e dënimit, u ndal në traversë.

Edicioni i 88-të i Superiores nisi me takimin e së premtes Vllaznia-Skënderbeu, që u mbyll gjithashtu në barazim (2-2).

Të dielën, në orën 21:00, do të luhen edhe dy takimet e fundit të javës së parë: Dinamo City – FK Vora, dhe Egnatia – Tirana.