Syri i kaltër, një nga mrekullitë natyrore më të bukura të Shqipërisë

TIRANË, 27 korrik /ATSH/ Parku natyror “Syri i kaltër” në Sarandë vijon të mbetet një atraksion absolut për pushuesit vendas dhe turistët e huaj, edhe gjatë këtij sezoni veror.

Kryeministri Edi Rama përcolli sot në rrjetet sociale pamje nga “Syri i kaltër” plot me turistë, duke e etiketuar këtë vend, si një nga mrekullitë natyrore më të bukura të Shqipërisë.

Pushuesit e shumtë kanë zgjedhur të shijojnë ujërat e ftohta të burimit, ndërsa realizojnë foto të ndryshme dhe shijojnë gastronominë tradicionale.

“Syri i kaltër” ndodhet pranë fshatit Muzinë, pranë rrugës nacionale Delvinë-Gjirokastër, rreth 30 minuta larg nga Saranda.

Ai është një pasuri natyrore e Shqipërisë, i cili me vendimet e muajit janar 2022 ka marrë një status më të lartë mbrojtjeje, atë të “Parkut Natyror”, me një sipërfaqe të rritur në 293 hektarë, për të mbrojtur më mirë Monumentin e Natyrës me të njëjtin emër, që mban brenda parkut.

/e.i/a.f/