TEHERAN – Irani konfirmon sulmin ndaj tre anijeve mallrash në Ngushticën e Hormuzit

TEHERAN, 22 prill /ATSH/- Forcat e armatosura të Iranit njoftuan sot se kishin sulmuar dhe çaktivizuar tre anije mallrash në brigjet e vendit, sipas medias shtetërore.

Në një deklaratë të transmetuar nga agjencia e lajmeve “Fars”, Garda Revolucionare tha se kishte ndaluar atë që e përshkruan si kalim “i parregullt” i anijeve përmes Ngushticës së Hormuzit.

Anijet u identifikuan si “Epaminondas”, që lundronin me flamurin liberian dhe udhëtonin nga Emiratet e Bashkuara Arabe në Indi; “MSC Francesca”, e cila u raportua për herë të fundit në brigjet e Arabisë Saudite dhe lundronte me flamurin panamez dhe një anije kontejnerësh me emrin “Euphoria”, për të cilën raportet iraniane thanë se është në pronësi greke.

“MSC Francesca” dhe “Epaminondas” u sekuestruan dhe u çuan në ujërat iraniane”, raportoi agjencia e lajmeve “Tasnim”, duke cituar marinën e Gardës Revolucionare.

Operacionet Tregtare Detare të Britanisë së Madhe (UKMTO), një agjenci britanike e sigurisë detare, raportoi sot dy incidente në ujërat pranë Iranit. //a.i/