Ta vazhdojmë reformën

Hajredin Kuçi ka kërkuar nga partitë politike të vazhdohet reforma zgjedhore dhe të mos bëhet zhurmë për efekte të brendshme elektorale. Duke iu përgjigjur Kreut të LDK’së rreth zbatimit të plotë të marrëveshjes politike që parasheh shkurtimin e mandatit të Presidentes, Kuçi ka thënë se PDK’ja është e gatshme për respektim të çdo ujdie në momentin që krijohen kushtet ligjore dhe kushtetuese.

Nënkryetari i PDK’së, Hajredin Kuçi u ka bërë thirrje partive politike në Kosovë që të vazhdohet reforma zgjedhore siç është paraparë me Marrëveshjen politike të vitit të kaluar.

Në këtë formë, Kuçi i është përgjigjur liderit të LDK’së, Isa Mustafa, i cili ka thënë se nuk do të votojë reformën zgjedhore dhe kushtetuese pa u zbatuar në përpikëri marrëveshja politike, e cila parasheh mandatin e kufizuar të Presidentes Atifete Jahjaga.

Hajredin Kuçi ka thënë se partia e tij nuk ka fuqi politike të ndryshojë vendimin e Gjykatës Kushtetuese sa i përket mandatit të Presidentes.

Por, ka kërkuar të mos bllokohet reforma zgjedhore e kushtetuese për shkak të një pakënaqësie.

“I ftoj të gjithë që të bisedojmë, t`i shohim mundësitë tona, Marrëveshja ka shumë pika për reformën zgjedhore, por ne nuk e kemi fuqinë politike që t`ia ndryshojmë mandatin dikujt tjetër”, ka thënë Kuçi për televizion publik.

“PDK’ja në këtë rast është dëmtuar nga vendimi i Gjykatës Kushtetuese. Çdo parametër flet se ne do t`i fitonim zgjedhjet, sikur në rastin e Ferizajt e Kaçanikut, e jo të tjerët që po bëjnë zhurmë sot që janë duke përdorë për fushata të brendshme elektorale”, ka deklaruar ai.

Sipas tij, Lideri i LDK’së mund t`i drejtohet Gjykatës Kushtetuese për sa i përket mandatit të Presidentes, ndërkohë ka thënë se nëse gjendet ndonjë mundësi për zbatimin e Marrëveshjes, atëherë PDK’ja do ta respektojë.

“Le ta gjejnë rrugën ata që po bëjnë zhurmë, ne e respektojmë Marrëveshjen njëqind për qind”, ka shtuar ai.

Ndërkohë, Lideri i LDK’së, Isa Mustafa ka ditë që është duke kërkuar zbatimin e Marrëveshjes politike sa i përket Presidentes, pavarësisht vendimit të Gjykatës Kushtetuese se mandati i Jahjagës është pesë vjet.

Mustafa ka thënë se vazhdon të besojë në zbatimin e Marrëveshjes dhe jo fjalëve të Kryeministrit se nuk do të këtë zgjedhje presidenciale dhe as parlamentare para afatit kushtetues dhe ligjor.

“Ne insistojmë që Marrëveshja të zbatohet, sepse pa zbatimin e saj nuk do të ketë kurrfarë votimi për reformën zgjedhore dhe për reformën kushtetuese”, ka thënë Lideri i LDK’së.

Ndryshe, Marrëveshja e arritur në prillin e vitit të kaluar ka kohë që është shkelur.

Afati i paraparë për përfundimin e reformës zgjedhore dhe kushtetuese kanë përfunduar, derisa dy herë u janë shtyrë mandatet dy komisioneve që merren me këto reforma.

Marrëveshje e nënshkruar mes PDK’së, LDK’së dhe AKR’së, e ndërmjetësuar nga Ambasada amerikane në Prishtinë, kishte paraparë mbajtjen e zgjedhjeve presidenciale më së largu në fund të këtij viti, ndërsa ato parlamentare në vjeshtën e vitit të ardhshëm.

Por, pas vendimit të Gjykatës Kushtetuese se mandati i Presidentes është pesë vjet, ka ndikuar që të paralajmërohet edhe fundi i kësaj marrëveshjeje, e cila po del se është antikushtetuese.

Presidentja, Kryeministri dhe amerikanët kanë kërkuar që mandati i Presidentes aktuale të mos preket, derisa LDK’ja dhe AKR’ja insistojnë që ajo t’u lëshojë udhë zgjedhjeve të drejtpërdrejta presidenciale.