Tajfuni Bavi godet Azinë Lindore. Kina në alarm për stuhinë, evakuon mbi 1.8 milionë banorë

Tajfuni Bavi po godet Azinë Lindore, duke detyruar autoritetet kineze të evakuojnë mbi 1.8 milionë banorë për shkak të rrezikut nga përmbytjet dhe erërat e forta. Stuhia pritet të prekë qytetin e Wenzhou, ku jetojnë rreth 10 milionë njerëz, pasi kaloi pranë Tajvanit dhe goditi ishujt jugorë të Japonisë me reshje intensive.

Sipas autoriteteve meteorologjike kineze, tajfuni ka erëra që arrijnë deri në 144 kilometra në orë, megjithëse është dobësuar gradualisht. Ekspertët paralajmërojnë se rreziku mbetet i lartë për shkak të sasisë së madhe të lagështirës që shoqëron stuhinë.

Vetëm në provincën Zhejiang janë evakuuar mbi 1.7 milionë banorë, ndërsa mijëra të tjerë janë larguar nga zonat e rrezikuara në provincën Fujian. Në Tajvan, autoritetet evakuuan mbi 14 mijë persona nga zonat malore dhe morën masa parandaluese për shkak të reshjeve të dendura të parashikuara.

Deri tani nuk raportohen viktima në Kinë, Japoni apo Tajvan si pasojë e tajfunit. Megjithatë, në Filipine të paktën 17 persona kanë humbur jetën nga përmbytjet dhe reshjet e rrëmbyeshme të lidhura me ndikimin e Bavit.

Në Tajvan janë raportuar edhe dhjetëra të plagosur, kryesisht nga rrëzimet dhe aksidentet e shkaktuara nga moti i keq. Autoritetet në rajon mbeten në gatishmëri, ndërsa tajfuni pritet të vazhdojë lëvizjen drejt bregdetit lindor të Kinës.

/rtsh.al/