Të martën në Tiranë/ Ministeriali i Ballkanit Perëndimor, në fokus ekonomia
Forcimi i bashkëpunimit ekonomik të vendeve të rajonit të Ballkanit Perëndimor dhe çuarja më tej e projekteve të Procesi të Berlinit do të sjellë të martën në Tirana krerët e dikastereve të ekonomisë të këtyre vendeve.
Ky ministerial ka në fokus ecurinë e zhvillimit të projekteve të ndryshme ekonomike, një përpjekje e vazhdueshme e shteteve të Ballkanit, për të lehtësuar bashkëpunimin rajonal.
Procesi i Berlinit është një iniciativë e udhëhequr nga Gjermania, qëllim i së cilës është bashkëpunimi rajonal në mes gjashtë shteteve të Ballkanit Perëndimor, me vizionin që të ndihmohen në përmbushjen e kritereve për t’u anëtarësuar në Bashkimit Evropian.
I nisur në vitin 2014 nga kancelarja gjermane Anxhela Merkel (Angela Merkel), komponenti më i rëndësishëm i procesit të Berlinit, është e ashtuquajtura “Agjenda e Konektivitetit”, e cila synon që gjashtë shtetet e Ballkanit Perëndimor t’i lidhë mes tyre në fushat e transportit dhe energjisë, duke u zgjeruar edhe në bashkëpunimin ekonomik.
Samitet e mbajtura, më herët, në Gjermani, Austri, Francë, Itali etj ndihmuan në vendosjen e komunikimit ndërmjet liderëve të Ballkanit, si dhe në ideimin e disa projekteve infrastukturore dhe të iniciativave rajonale.
Projektet e miratuara për secilin shtet të Ballkanit Perëndimor financohen pjesërisht nga mekanizmat e BE-së dhe pjesërisht nga vetë këto shtete.
Qeveritë kanë vendosur një rrjet themelor dhe gjithpërfshirës rajonal të infrastrukturës, duke e bërë kështu Ballkanin Perëndimor pjesë të Rrjetit Trans-Evropian të Transportit (TEN-T).
Gjithashtu, Procesi i Berlinit ka gjeneruar edhe iniciativa të lidhjeve rajonale, siç janë bashkëpunimi në energji, Zyra Rajonale e Bashkëpunimit Rinor (RYCO), krijimi i një Zone Ekonomike Rajonale dhe nënshkrimi i Traktatit të Komunitetit të Transportit.
Nuk ka ende një detajim të axhendës së të martës në Tiranë, në ministerialin e krerëve të ekonomisë të rajonit, ndërsa mësohet se zyrtarët shqiptarë janë në minutat e fundit të përgatitjes për një nivel sa më të lartë të samitit.
Procesi i Berlinit nis me Konferencën e nivelit të lartë të mbajtur në Berlin më Gusht 2014.
Gazetar: Bardhi Sejdarasi
/rtsh.al/