TemA TV/ PD: Për Ramën nuk ekziston më 21 janari. Ne do vendosim drejtësi për këtë ngjarje (VIDEO)
Zëdhënësja e Partisë Demokratike, Laura Vorpsi, në një deklaratë për shtyp, tha se për kryetarin e Partisë Socialiste nuk ekziston më çështja e 21 janarit.
Edi Rama u rrëfye hapur të enjten se ai tashmë është i frikësuar deri në neveritet nga 21 Janari, se ai trembet dhe nuk i pëlqen më të flasë për këtë histori, dhe se tani Top Story i tij është koalicioni i ri i ngjalave.
Madje ai shkoi edhe më larg kur tha se atyre që vazhdojnë të flasin për 21 Janarin, u ka lënë mallkimin e zotave.
Rama nuk u ndal këtu, por tha se aleancën e ngjalave e ka bërë pikërisht si aleancë shpëtimi për 21 Janarin.
Hapur dhe troç, z. Rama manifestoi publikisht të enjten se 21 Janari atë e tmerron dhe se nuk ka qenë asnjëherë për të një çështje parimi e drejtësie, por mirëfilltas një pjesë e strategjisë se tij për të marrë pushtetin me dhunë dhe më pas për nekrofili elektorale, tha Vorpsi.
Zëdhënësja e PD tha se Rama kërkon që të fshijë këtë ngjarje.
Në rrëfimin e tij Rama tregoi dhe një herë se i mungon çdo lloj refleksi moral, dhe tashmë është e qartë për të gjithë se ai, si njeriu që manipuloi videon që përdori si pretekst për 21 Janarin, si organizator kryesor i përpjekjes për të ardhur në pushtet me dhunë, si kameleon që u përpoq të përdorte dhimbjen e familjarëve të viktimave si mburojë për krimin e tij të shëmtuar, për atë çka meritoi shaminë në fytyrën e tij, po bën çdo gjë për ti shpëtuar drejtësisë!
Këtë e kuptuan më mirë se kushdo vetë socialistët, të cilët treguan një pakënaqësi të paparë në adresat e tij në rrjetet sociale, theksoi Vorpsi.
Ajo tha se Rama manipuloi mbështetësit e tij, i la ata në baltë, shfrytëzoi viktimat, dhe tani thotë se ndjen neveri!
Partia Demokratike i kërkon drejtësisë të mos ndikohet nga këto lojëra politike dhe garanton shqiptarët se ajo do të bëjë gjithçka për të vendosur drejtësi dhe për të vënë përpara përgjegjësisë organizatorët dhe nxitësit e dhunës së pashembullt ndaj institucioneve, që solli 4 të vrarë!/ep