Tensione të shkallëzuara në Lindjen e Mesme, valë sulmesh në Kuvajt e Ngushticën e Hormuzit dhe kërcënime të reja nga Teherani

Rajoni i Lindjes së Mesme po përballet me një valë të re përshkallëzimi ushtarak dhe pasigurie detare, ku sulmet me dronë, bllokadat e naftës dhe kërcënimet e drejtpërdrejta retorike po rrisin rrezikun e një konflikti më të gjerë rajonal.

Ushtria e Kuvajtit njoftoi se po u përgjigjet sulmeve të reja me dronë iranianë që goditën disa pika strategjike në vend. Sa i përket objektivave të goditura, Zëdhënësi i Ministrisë së Mbrojtjes në Kuvajt, Gjeneral Major Saud Abdulaziz Al-Otaibi, deklaroi se “objektivat përfshinin një ndërtesë qeveritare në Kuvajtin verior.”

Paralelisht, trafiku detar tregtar në Ngushticën e Hormuzit mbetet nën goditje të vazhdueshme. Agjencia e Operacioneve Tregtare Detare të Mbretërisë së Bashkuar (UKMTO) konfirmoi se dy anije cisternë u përballën me shpërthime dhe predha pranë brigjeve të Omanit gjatë 48 orëve të fundit, duke dëmtuar dhomën e motorit të një prej mjeteve.

Huthitë pretendojnë bllokadë të eksporteve saudite

Në një tjetër front të tensionit detar, lëvizja Huthi e Jemenit deklaroi se ka devijuar tetë tankerë sauditë nafte nga rrugët e tyre të zakonshme drejt Azi-Paqësorit, duke i detyruar ato të marrin rrugën më të gjatë rreth Kepit të Shpresës së Mirë në Afrikën e Jugut.

Grupi i mbështetur nga Teherani theksoi se ky veprim shërben si hakmarrje ndaj presioneve politike e ushtarake të Riadit. Megjithatë, autoritetet e Arabisë Saudite nuk e kanë konfirmuar zyrtarisht devijimin e anijeve të tyre. Shqetësimi ndërkombëtar po përqendrohet gjithashtu te Ngushtica Bab al-Mandab, ku çdo pengesë shtesë do të rriste paralisën e rrugëve tregtare ujore.

Paralajmërimi i Iranit për fqinjët rajonalë

Në këtë kuadër përplasjesh, Teherani ka lëshuar një paralajmërim të ashpër për shtetet e rajonit që mbështesin apo strehojnë forcat amerikane, ndërsa Presidenti i SHBA-së, Donald Trump, ka rikthyer kërcënimet për goditje të reja ndaj infrastrukturës energjetike iraniane.

Duke akuzuar Uashingtonin për përshkallëzim të situatës, kreu i komandës qendrore ushtarake të Iranit, Ali Abdollahi, deklaroi përmes televizionit shtetëror se “Shtetet e Bashkuara po ecin me shpejtësi në rrugën e përshkallëzimit të tensioneve në rajon. Çdo vend që shërben si mburojë mbrojtëse për Amerikën kriminale dhe agresive do të përfshihet nga flakët e luftës.”

/rtsh.al/