Zbulohet laboratori gjigant i metamfetaminës në Nigeri, arrestohen 3 meksikanë dhe sekuestrohen drogë e kimikate me vlerë 300 milionë euro

Agjencia Kombëtare e Zbatimit të Ligjit për Drogën (NDLEA) në Nigeri ka zbuluar laboratorin më të madh të metamfetaminës në shkallë industriale të gjetur ndonjëherë në vend, i vendosur në shtetin Ogun. Operacioni ka rikthyer në vëmendje përpjekjet e karteleve ndërkombëtare për të shndërruar Afrikën Perëndimore në një bazë kyçe prodhimi.

Gjatë ndërhyrjes së agjencive ligjzbatuese, u arrestuan 10 persona (shtatë nigerianë dhe tre shtetas meksikanë), duke vërtetuar praninë e drejtpërdrejtë të rrjeteve të huaja të krimit të organizuar. Në vendngjarje u konfiskua një sasi gjigante e lëndëve narkotike dhe lëndëve të para.

“U zbuluan më shumë se 2.4 ton kimikate, si dhe metamfetaminë kristalore me vlerë mbi 300 milionë euro (345 milionë dollarë).”, njoftoi policia.

Në një procedurë të rrallë ligjore, zyrtarët e NDLEA-s i janë drejtuar gjykatës për të marrë miratimin zyrtar për çmontimin e sigurt të objektit të rrezikshëm industrial.

Lidhjet me krimin ndërkombëtar dhe terrorizmin

Zbulimi i këtij laboratori ka rritur shqetësimin e ekspertëve të sigurisë rajonale dhe ndërkombëtare. Prania e teknikëve dhe përfaqësuesve të karteleve meksikane konfirmon synimin e krimit të organizuar për të përdorur Afrikën Perëndimore jo vetëm si pikë tranziti, por edhe si qendër kryesore për përpunimin e drogave sintetike.

Analistët e sigurisë paralajmërojnë se zgjerimi i rrjeteve të tilla krijon lidhje financiare direkte midis kriminelëve ndërkombëtarë dhe grupeve ekstremiste e terroriste që veprojnë në rajonin e Afrikës Perëndimore.

/rtsh.al/