Tensionet në veri, Stoltenberg: NATO, e gatshme të dërgojë më shumë trupa në Kosovë

NATO është shprehur e gatshme të dërgojë më shumë trupa në Kosovë, pas trazirave si pasojë e protestave të serbëve që kundërshtuan marrjen e detyrës nga  kryetarët e rinj të komunave.

NATO ka dërguar tashmë 700 përforcime në Kosovë, por shefi i NATO-s Jens Stoltenberg tha se mund të nevojiten më shumë. “NATO do të mbetet vigjilente. Ne do të jemi atje për të siguruar një mjedis të sigurt dhe të sigurt, si dhe për të qetësuar dhe ulur tensionet”, tha Stoltenberg në takimin e ministrave të jashtëm të NATO-s në Oslo ndërsa shtoi se 700 trupat e para përforcuese, janë tashmë në rrugë për në Kosovë.

Aleanca tashmë ka 4000 trupa atje.

Prishtina dhe Beogradi kanë fajësuar njëra-tjetrën për trazirat në veri ndërsa Bashkimi Evropian është shprehur i gatshëm të vazhdojë të bisedojë me të dyja palët.

“NATO do të jetë vigjilente. Mesazhi ynë për Beogradin dhe Prishtinën është se ata duhet të angazhohen në mirëbesim për dialogun e organizuar nga BE-ja”, tha Jens Stoltenberg sipas BBC. 

Trazirat u intensifikuan në rajon pas zgjedhjeve të prillit të cilat serbët i bojkotuan, duke i dhënë fitoren në katër komuna me shumicë serbe kandidatëve shqiptarë etnikë, të cilët përbëjnë 90% të popullsisë së Kosovës.

SHBA, të cilat mbështetën pavarësinë e Kosovës nga Serbia, kritikuan vendimin e Kosovës për të vendosur kryebashkiakë shqiptarë etnikë në Kosovën veriore “me mjete të dhunshme” dhe e dëbuan Kosovën nga pjesëmarrja në një stërvitje ushtarake të udhëhequr nga amerikanët në Evropë.

Në tre rajonet Zubin Potok, Zveçan dhe Mitrovicën e Veriut kryetarët e sapozgjedhur nuk punojnë nga zyrat e tyre në bashkitë, me qëllim ruajtjen e qetësisë në këto qytete.

Kosova shpalli pavarësinë në vitin 2008, por Serbia nuk e njeh atë.

/rtsh.al/