Tiranë/ Goditet një “call center” , 4 shtetas në pranga, pronari në kërkim

Tiranë/Finalizohet operacioni policor i koduar “INVESTING”.
Një tjetër call center mashtrues është goditur në Tiranë.
Policia ka hyrë në një ambient në Rrugën e Kavajës, të zbuluar nga Krimi Ekonomik, ku ka arrestuar 4 persona, të cilët i ka kapur në flagrancë.

Të arrestuar janë Emirjon Xhafa, 40 vjeç, Genci Ndoni, 42 vjeç, Ekzon Dervishi, 32 vjeç dhe Eroll Hyslihaka, 31 vjeç. Pronari Taulant Beleraj, 45 vjeç, është shpallur në kërkim ndërsa një 23-vjeçare është nën hetim në gjendje të lirë.

Përmes platformës online, ata mashtronin qytetarë të vendeve të Bashkimit Europian për t’u marrë para.

Në bazën e ‘call center’-it janë gjetur dhe blloqet me emrat e klientëve të mashtruar. Skema e mashtrimit nuk funksiononte vetëm me bursat fiktive, por të arrestuarit i merrnin sërish klientët e mashtruar në telefon duke iu prezantuar si avokatë për t’i ndihmuar të rikuperonin shumat e humbura. Në këtë pikë i mashtronin sërish duke i marrë nga 5 mijë deri në 10 mijë euro.