Tre të dënuar për vrasje pranga në Holandë, Itali

Tre shtetas shqiptarë të shpallur në kërkim ndërkombëtar për vrasje janë arrestuar në Itali dhe në Holandë. Tre të arrestuarit do të ekstradohen në Shqipëri ku akuzohen për vrasje të kryera në 2004 dhe në 1999. 

TIRANE- Sipas njoftimit të Zyrës Qëndrore Kombëtare Interpol Tirana tre të arrestuarit janë Fredi dhe Sokol Aliaj të dy 28 vjec nga qyteti i Fierit, dhe Alban Lika i njohur si Lin Gjekaj 35 vjec nga qyteti i Shkodrës.

Fredi dhe Sokol Aliaj, 4 vjet më parë së bashku me Ismet Boriçin, Platon Pepën akuzohen se kanë vrarë Robert Mitron. Viktima u gjet i vrarë me sende të forta në plazhin e Durrësit, në janar të vitit 2004. Sipas policisë, konflikti mes viktimës dhe të dyshuarve si autorë kishte ardhur për shkak të një vajze, e cila ishte kushërira e Boriçit. Sipas policisë, Mitro bashkëjetonte me të dhe të dyshuarit si autorë pretendonin se kishte për qëllim ta trafikonte.
Më 7 maj Gjykata e Krime të Rënda deklaroi fajtor Fredi dhe Sokol Aliajn për vrasje në rrethana të tjera cilësuese , duke i shkaktuar mundime të veçanta viktimës Robert Mitro dhe i dënoi përkatësisht me 23 vjet burg dhe 20 vjet burg.
Ndërsa 35 vjecari Alban Lika nga qytet i Shkodrës është arrestuar në Itali pasi akuzohet për vrasjen e Tonin Dedës, ngjarje e ndodhur në 1999 po në Shkodër.

Shtetasi Alban Lika është shpallur në kërkim ndërkombëtar sepse Gjykata e Rrethit Gjyqësor Shkodër, me vendimin nr. 195, datë 22.06.2000, e ka dënuar me 17 vjet heqje lirie, për kryerjen e veprës penale të “Vrasjes dhe armëmbajtje pa leje” parashikuar nga nenet 76 dhe 278/2, të Kodit Penal Shqiptar.

Kapja e këtyre shtetasve është bërë në sajë të ndjekjes profesionale dhe bashkëpunimit e shkëmbimit të informaciont ndërmjet Zyrës Qendrore Kombëtare Interpol Tirana me strukturat homologe në Holandë dhe Itali.

(s.g/BalkanWeb)