“Trillim i ulët i mediave të opozitës – Vila e Vlorës është shtëpi pritje për personalitetet e larta”

Reagon Drejtoria e Shërbimeve Qeveritare

Drejtoria e Shërbimeve Qeveritare e cilësoi trillim të ulët kronikën e shfaqur në Top-Channel, lidhur me një rezidencë qeveritare në Vlorë, ku pretendohej se ndërtesa në fjalë është rezidencë e vetë Kryeministrit. Në një reagim për mediat, zëdhënësi i Drejtorisë së Shërbimeve Qeveritare sqaron se, Vila në Vlorë, e paraqitur në kronikën e televizionit Top Channel, është rezidencë qeveritare, shtëpi pritje për personalitete të larta të vendit dhe të huaja, miq të shquar të Shqipërisë, por jo rezidencë e Kryeministrit.
“Dje, televizioni “Top Channel”, transmetoi në edicionin e tij të lajmeve një montim lidhur me një rezidencë qeveritare në Vlorë, të cilën e paraqiti, duke shpifur, si rezidencë të Kryeministrit Berisha. Lidhur me këtë kronikë, zëdhënësi i Drejtorisë së Shërbimeve Qeveritare sqaron opinionin publik sa vijon: Vila në Vlorë, e paraqitur në kronikën e televizionit Top Channel, është rezidencë qeveritare, shtëpi pritje për personalitete të larta të vendit dhe të huaja, miq të shquar të Shqipërisë. Pretendimi i televizionit Top Channel se Vila Qeveritare në Vlorë është rezidencë e Kryeministrit është një trillim i ulët, i denjë për çakej dhe gjobëvënës, që përdorin median për prerje gjobash dhe qëllime të tjera të kundërta me misionin e tyre.
Gjithashtu, lidhur me çështjen në fjalë, zëdhënësi i Drejtorisë së Shërbimeve Qeveritare kujton se, gazetarët gjobë-prerës të Top Channel, që shpallin shtëpinë e pritjes në Vlorë si rezidencë të Kryeministrit Berisha, janë po ata që montuan në zyrat e Edi Ramës videon e 21 janarit dhe që servirën shumë herë si veturë të Kryeministrit, makinën Mercedes të blerë nga kjo Drejtori për transportin e kryetarëve të shteteve, kryeministrave dhe kryetarëve të Parlamenteve të vendeve mike, që vizitojnë Shqipërinë dhe që nuk është përdorur asnjëherë nga Kryeministri apo personalitete të tjera të vendit.